ای رکشوں کا۱۰روپے فی کلو میٹر فی مسافر کرایہ مقرر

سرینگر//
جموں کشمیر کے ٹرانسپورٹ کمشنر ویش پال مہاجن کا کہنا ہے کہ الیکٹرک رکشوں کا کرایہ زیادہ سے زیادہ چھ کلومیٹر تک دس روپیہ فی کلومیٹر فی سواری مقرر کیا گیا ہے ۔
مہاجن نے ساتھ ہی کہا کہ تمام دیگر آٹو رکشوں کیلئے میٹر لگانا لازمی ہے ۔
ٹرانسپورٹ کمشنر نے ان باتوں کا اظہار ہفتے کو یہاں نامہ نگاروں کے ساتھ بات کرنے کے دوران کیا۔
مہاجن نے کہا’’الیکٹرک رکشوں کا کرایہ زیادہ سے زیادہ ۶کلو میٹر تک فی مسافر کیلئے۱۰روپے فی کلومیٹر مقرر کیا گیا ہے اور تمام دیگر آٹو رکشوں کیلئے میٹر لگانا لازمی ہے ‘‘۔
ٹرانسپورٹ کمشنر کا کہنا تھا کہ مسافروں سے زیادہ کرایہ وصول کرنے والے ڈرائیوروں اور مناسب اجازت کے بغیر آٹو چلانے والوں کے خلاف تحت قانون سخت کارروائی کی جائے گی۔
روڈ سیفٹی کی اہمیت کو اجاگر کرتے ہوئے مہاجن نے کہا کہ روڈ سیفٹی کے لئے ڈرائیور سب سے اہم رول ادا کرتے ہیں۔
مہاجن نے کہا کہ روڈ سیفٹی ڈرائیور کی بنیادی ذمہ داری ہے اور ٹریفک قوانین پر من و عن عمل کرنے سے سڑک حادثات کو کم کیا جا سکتا ہے ۔ان کا کہنا تھا کہ ڈرائیور حضرات کو اوور سپیڈنگ اور اوور لوڈنگ سے اجتناب کرنا چاہئے ۔
لائسنس جاری کرنے کے بارے میں پوچھے جانے والے ایک سوال کے جواب میں انہوں نے کہا’’اس میں تاخیر ہوجاتی ہے لیکن لائسنس پرنٹنگ کیلئے ایک نیا ٹینڈر تقریباً مکمل ہو چکا ہے اور لائسنس جلد ہی ڈاک کے ذریعے فراہم کیے جائیں گے ‘‘۔
کمشنر نے شہریوں پر بھی زور دیا کہ وہ مقررہ راستوں پر سفر کریں۔انہوں نے کہا کہ عوامی تحفظ کو یقینی بنانے کیلئے اقدامات کیے جا رہے ہیں۔