بدھل اموات: تحقیقات میں تیزی کی ہدایت

حکومت اس بات کو یقینی بنانے کیلئے پرعزم ہے کہ بیماری کی اصل وجہ کی جلد از جلد نشاندہی کی جائے:عمرعبداللہ
جموں//
وزیر اعلیٰ‘عمر عبداللہ نے راجوری ضلع کے بدھل گاؤں کی تشویشناک صورتحال پر تبادلہ خیال کرنے کیلئے آج ایک اعلیٰ سطحی اجلاس کی صدارت کی، جہاں پراسرار موت وں نے ۱۶ لوگوں کی جان لے لی ہے۔
اجلاس میں وزیر صحت و میڈیکل ایجوکیشن سکینہ ایٹو نے شرکت کی۔ وزیراعلیٰ کے مشیر ناصر اسلم وانی چیف سکریٹری، اٹل ڈولو۔ چیف منسٹر کے ایڈیشنل چیف سکریٹری دھیرج گپتا۔ اے ڈی جی پی جموں آنند جین۔ ڈویڑنل کمشنر جموں رمیش کمار۔ سیکرٹری صحت و میڈیکل ایجوکیشن ڈاکٹر سید عابد رشید شاہ اور دیگر سینئر میڈیکل و پولیس افسران۔
سیکریٹری صحت و میڈیکل ایجوکیشن نے وزیراعلیٰ کو اب تک کئے گئے اقدامات سے آگاہ کیا۔
سیکرٹری صحت و میڈیکل ایجوکیشن نے بتایا کہ محکمہ صحت کی ٹیموں نے متاثرہ علاقے میں۳۰۰۰سے زائد رہائشیوں کا گھر گھر جا کر سروے کیا، پانی، خوراک اور دیگر مواد کے نمونے جمع کیے اور ان کی جانچ کی۔
انہوں نے بتایا کہ انفلوئنزا اور دیگر ممکنہ آلودگیوں سمیت تمام ٹیسٹ کے نتائج منفی آئے ہیں۔
اجلاس کو بتایا گیا کہ آئی سی ایم آر، نیشنل انسٹی ٹیوٹ آف وائرولوجی، نیشنل سینٹر فار ڈیزیز کنٹرول، سی ایس آئی آر، ڈی آر ڈی او اور پی جی آئی ایم ای آر چندی گڑھ سمیت اہم قومی اداروں کی جانب سے اضافی جانچ کی گئی لیکن اموات کی کوئی واضح وجہ معلوم نہیں کی گئی۔
پولیس حکام نے اجلاس کو بتایا کہ اموات کی اصل وجہ کا تعین کرنے کے لیے تحقیقات جاری ہے جو ایک دوسرے سے ڈیڑھ کلومیٹر کے فاصلے پر رہنے والے تین خاندانوں تک محدود ہیں۔
صورتحال کی نزاکت پر روشنی ڈالتے ہوئے وزیر اعلیٰ عمر عبداللہ نے محکمہ صحت اور پولیس کو ہدایت دی کہ وہ اپنی تحقیقات میں تیزی لائیں۔
وزیر اعلیٰ نے کہا کہ ان اموات کی غیر واضح نوعیت انتہائی تشویش ناک ہے اور حکومت اس بات کو یقینی بنانے کیلئے پرعزم ہے کہ اس کی اصل وجہ کی جلد از جلد نشاندہی کی جائے۔’’ میں تمام محکموں پر زور دیتا ہوں کہ وہ تعاون کریں اور اس مسئلے کو حل کرنے میں کوئی کسر نہ چھوڑیں‘‘۔
اجلاس کے دوران اس بات پر بھی زور دیا گیا کہ محکمہ صحت نے گزشتہ ۴۰روز سے علاقے میں فعال موجودگی برقرار رکھی ہے اور کسی بھی ہنگامی صورتحال سے نمٹنے کیلئے ایمبولینس، ادویات اور ضروری سہولیات فراہم کی ہیں۔
سوگوار خاندانوں سے دلی تعزیت کا اظہار کرتے ہوئے وزیراعلیٰ نے عوام کو یقین دلایا کہ انتظامیہ اس صورتحال کو انتہائی ترجیح دے رہی ہے۔
عمرعبداللہ نے کہا ’’ہمارے شہریوں کی صحت اور حفاظت ہماری اولین ترجیح ہے۔ حکومت اس بحران کو حل کرنے اور متاثرہ خاندانوں کے لئے انصاف کو یقینی بنانے کیلئے پوری طرح پرعزم ہے۔‘‘