کولگام اور پلوامہ میں فورسز اور جنگجوؤں میں جھڑپیں‘۲ مقامی جنگجوہلاک

سرینگر//
جنوبی کشمیر کے کولگام اور پلوامہ میں سیکورٹی فورسز کے ساتھ تصادم آرائیوں میں دو جنگجو مارے گئے۔
پولیس کے ایک ترجمان نے یو این آئی اردو کو تفصیلات فراہم کرتے ہوئے بتایا کہ مصدقہ اطلاع موصول ہونے کے بعد ۹آر آر‘۱۸بٹالین سی آر پی ایف اور جموں وکشمیر پولیس نے کھانڈے پورہ کولگام گاوں کو محاصرے میں لے کر تلاشی آپریشن شروع کیا۔
ترجمان نے بتایا کہ سیکورٹی فورسز کے اہلکاروں نے جوں ہی مشتبہ مقام کی اور پیش قدمی شروع کی تو وہاں پر موجود ملی ٹینٹوں نے فورسز پر اندھا دھند فائرنگ شروع کی ۔ اُن کے مطابق سیکورٹی فورسز نے آس پاس رہائش پذیر لوگوں کو محفوظ مقامات کی اور منتقل کیا جس کے بعد سلامتی عملے نے جوابی کارروائی شروع کی ۔ انہوں نے مزید بتایا کہ گولیوں کا تبادلہ تھم جانے کے بعد تصادم کی جگہ ایک جنگجو کی لاش برآمد کی گئی جس کی بعد میں شناخت راسخ احمد گنائی ولد محمد امین گنائی ساکن سوچ کولگام کے بطور ہوئی ہے اور وہ حزب سے وابستہ تھا۔
پولیس ریکارڈ کے مطابق مہلوک جنگجو سیکورٹی فورسز پر حملوں کی منصوبہ بندی کرنے اور اُنہیں پایہ تکمیل تک پہنچانے میں پیش پیش تھا جبکہ اُس کے خلاف کئی ایف آئی آر بھی درج تھے۔
ترجمان نے کہاکہ ہلاک شدہ ملی ٹینٹ کے قبضے سے ایک رائفل‘۲۳گولیوں کے راونڈ، ایک پستول‘ ۳۱پستول گولیوں کے راؤنڈ اور ایک ہینڈ گرینیڈ برآمد کرکے ضبط کیا گیا۔ انہوں نے بتایا کہ پولیس نے معاملے کی نسبت کیس درج کرکے مزید تحقیقات شروع کی ہے۔
دریں اثنا اثنا پولیس نے عوام سے پْر زور اپیل کی ہے کہ وہ جائے تصادم پر جانے سے تب تک گریز کیا کریں جب تک اْسے پوری طرح سے صاف قرار نہ دیا جائے کیونکہ پولیس اور دیگر سلامتی ادارے لوگوں کے جان و مال کی محافظ ہے لہذا لوگوں کی قیمتی جانوں کو بچانے کیلئے پولیس ہر ممکن کوشش کرتی ہے۔ چنانچہ ممکن طور جھڑپ کی جگہ بارودی مواد اگر پھٹنے سے رہ گیا ہو تو اْس کی زد میں آکر کسی کی جان بھی جاسکتی ہے۔ اسی لئے لوگوں سے بار بار اپیل کی جاتی ہے کہ وہ جھڑپ کی جگہ کا رخ کرنے سے اجتناب کریں۔
لوگوں سے التجا کی جاتی ہے کہ وہ حفاظتی عملے کو اپنا کام بہ احسن خوبی انجام دینے میں بھر پور تعاون فراہم کریں تاکہ کوئی ناخوشگوار واقع پیش نہ آسکیں۔علاوہ ازیں جنوبی ضلع پلوامہ کے دربگام علاقے میں ہفتے کی سہ پہر کو سیکورٹی فورسز اور جنگجووں کے مابین گولیوں کا تبادلہ ہوا ہے۔
پولیس کے ایک ترجمان نے ٹویٹ کے ذریعے جانکاری دیتے ہوئے بتایا کہ دربگام پلوامہ میں ابتدائی گولیوں کے تبادلے میں ایک جنگجو مارا گیا جس کی شناخت اور تنظیمی وابستگی کے بارے میں جانچ پڑتال شروع کی گئی ہے۔
ترجمان نے بتایا کہ علاقے میں آپریشن ہنوز جاری ہے جبکہ آس پاس علاقوں کو پوری طرح سے سیکورٹی فورسز نے محاصرے میں لے لیا ہے۔