افغانستان نے دوسرے ٹیسٹ میں زمبابوے کو 72 رنز سے شکست دیکر سیریز 0-1 سے جیت لی۔
بلاوائیو میں کھیلے گئے سیریز کے دوسرے میچ میں راشد خان کی تباہ کن بولنگ کی بدولت افغانستان نے زمبابوے کو شکست دے دی۔
راشد خان نے دوسری اننگز میں سات کھلاڑیوں کو پویلین کی راہ دکھائی جبکہ پہلی اننگز میں انہوں نے 4 وکٹیں اپنے نام کی تھیں۔
دوسرے ٹیسٹ کی پہلی اننگز میں افغان ٹیم 157 رنز پر آؤٹ ہوگئی تھی، زمبابوے نے اپنی پہلی اننگز میں 243 رنز بنائے۔
افغانستان نے 86 رنز کے خسارے سے دوسری اننگز شروع کی اور 363 رنز اسکور کیے۔
زمبابوے کو جیت کیلئے 278 رنز کا ہدف ملا جس کے جواب میں پوری ٹیم 205 رنز پر آؤٹ ہوگئی۔
راشد خان کو شاندار پرفارمنس پر مین آف دی میچ قرار دیا گیا جبکہ رحمت شاہ 392 رنز بنانے پر سیریز کے بہترین کھلاڑی قرار پائے۔
یاد رہے کہ دونوں ٹیموں کے درمیان سیریز کا پہلا میچ ڈرا ہوگیا تھا جبکہ اس سے قبل ون ڈے اور ٹی 20 سیریز میں بھی افغانستان نے کامیابی سمیٹی تھی۔
