نیشنل کانفرنس کی اتحادی کانگریس کی یو ٹی لیڈرشپ اتحاد کے بارے میں مسلسل دعویٰ کر رہی ہے کہ دونوں پارٹیوں کا اتحاد مضبوط اور مستحکم ہے لیکن حکومت کی تشکیل کے بعد سے اب تک صورتحال کے حوالے سے جو پیشرفت ہوسکی ہے وہ کچھ اور ہی کی جانب اشارے کر رہی ہے۔
مہاراشٹر، جارکھنڈ وغیرہ میں انتخابات کے دوران حکمران بی جے پی نے جموںوکشمیر کی سیاست اور پارٹی منشوروں کو لے کر جس انداز میں رائے دہندگان کے سامنے پیش کیا اور انہیں جذباتی رنگ میں رنگنے میں کافی حد تک کامیابی بھی حاصل کر لی کانگرس اُس دباؤ کی تاب نہیں لا سکی ہے اور اب تک گزرے کئی دنوں کے دوران کانگریس کی قیادت باالخصوص پارٹی صدر کھرگے اور یو ٹی کی کانگریسی لیڈرشپ بشمول طارق حمیدقرہ بار بار یہ صفائی پیش کرنے پر مجبور ہوتے رہے کہ کانگریس کالعدم شدہ دفعہ۳۷۰ اور ۳۵؍ اے کی بحالی کا مطالبہ نہیں کرتی ہے کیونکہ ان آئینی دفعات کے بارے میں سپریم کورٹ کا فیصلہ واضح ہے۔ البتہ کانگریس ریاستی درجہ کی بحالی کے مطالبے پر قائم ہے جس کو اتنی ہی عجلت کے ساتھ اب بحال کیا جانا چاہے جس عجلت کے ساتھ ریاستی درجہ ختم کر دیا گیا تھا۔
نیشنل کانفرنس کانگریس کے اس موقف پر کھل کر سامنے نہیں آرہی ہے صرف یہ کہنے پر اکتفا کر رہی ہے کہ ہمارا چنائو منشور عوام کے سامنے ہے، جبکہ کانگریس کے ساتھ اتحاد جموںوکشمیر تک محدود نہیں بلکہ یہ اتحاد ملکی سطح پر ہے اور نیشنل کانفرنس اپوزیشن اتحاد اِنڈیا بلاک کا حصہ ہے ۔
حکمران جماعت بی جے پی نے کانگریس کو اس حد تک دبائو میں لایا کہ اس کے لیے جموںو کشمیر کے تعلق سے آئینی ضمانتوں کی بحالی کے مطالبات سے دامن چھڑائے بغیر اور کوئی آپشن باقی نہیں رہ گیا تھا۔ کانگریس جس کی پارلیمنٹ میں تقریبا ۱۰۰؍ نشستیں ہیں اور ملک کی دوسری بڑی اکثرتی جماعت ہے کے لیے یہ سرنڈر شرمناک ہی نہیں بلکہ کانگریس کی اس شرمنا کی اور ڈھٹائی کی اپنی ایک تاریخ ہے۔
کانگریس صدر کھرگے کا یہ اعتراف درحقیقت ملک میں برسر اقتدار رہی کانگریس سرکاروں کی اُس شرمناک عہد شکنی کا ایک اور اعادہ ہے جو کانگریس پارٹی اور اس کی حکومتی قیادت جموںو کشمیر کے عوام اور اس کی لیڈرشپ کے ساتھ دوستی کے عہد و پیمان کی آڑ میں پیٹ پیچھے چھرا گھونپ گھونپ کر کرتی رہی لیکن بد قسمتی یہ رہی کہ نیشنل کانفرنس کی وقت وقت کی قیادت کانگریس کے تلوے چاٹتی رہی اور یہی تلوے چاٹ چاٹ کر اپنے لیے تحفظ اقتدار کو یقینی بھی بناتی رہی اور حصول اقتدار کے راستے بھی ہموار کرتی رہی۔
بے شک نیشنل کانفرنس کو عوام کی طرف سے ایک بار پھر والہانہ حد تک منڈیٹ حاصل ہوا لیکن اس منڈیٹ کے پیچھے کچھ خواہشیں ہیں، کچھ سوالات ہیں، کچھ جائز مانگیں ہیں اور سب سے بڑھ کر سیاسی استحکام ،عزت نفس، ثقافت اور منفرد تشخص کے تحفظ کے تعلق سے حساس نوعیت کی کئی ایک آرزوئیں ہیں۔ عوام کے تعاون سے اقتدار تو ملا لیکن سب سے بڑا سوال یہی ہے کہ عوام کی یہ ساری خواہشیں اور درپیش مسائل کب تک حل ہوں گے یا تمام تر توجہ اور توانائی استحکام اقتدار اور اس حوالہ سے جانے والے راستوں کی آبیاری پر ہی مرتکز رہیگی؟
انتظامی سطح پر معاملات حصول اقتدار کے ڈیڑھ ماہ گزر جانے کے باوصف ابھی تک ہائی برڈ حکومتی نظام کے بھنور میں پھنسے ہیں ۔ریکروٹمنٹ سے جڑے معاملات ،بے روزگاری ایسے سنگین مسئلے پر عدم پیش رفت، بجلی کا بحران ایک نئے آکار میں عوام کے سر پر سایہ فگن کر دیا گیا ہے، ریزرویشن کی حد ۶۰؍ فیصد کو چھو رہی ہے جبکہ ریزرویشن کے زمرے میں جو لوگ شرح تناسبت کے تعلق سے آبادی کا حصہ بنے ہوئے ہیں ان کی مجموعی آبادی اتنی نہیں ہے جبکہ ان زمروں کے تحت ریکروٹمنٹ کو یقینی بنانے کے لیے بیرون جموںو کشمیر سے بھی بھرتیاں عمل میں لانے یا جگہیں مخصوص رکھنے کی باتیں اب شدت کے ساتھ سامنے آرہی ہے، اس حوالے سے جموںیونیورسٹی میں گوجر بکروال طبقہ سے تعلق رکھنے والے طلبہ سڑک پر بھی آ چکے ہیں ،۵۷۵ لیکچر اروں کی بھرتی کیلئے جنرل زمرے کے تحت صرف۲۳۸جگہیں مخصوص رکھی گئی ہیں جبکہ زمروں کے لیے ۳۳۷؍ جو ریزرویشن کی ۶۰ فیصد سطح کو چھو رہے ہیں ۔
لوگ سوال کر رہے ہیں کہ یہ کیا ہو رہا ہے، تبدیلی کے لئے لوگوں نے ووٹ دیئے لیکن زمینی سطح پر کوئی تبدیلی دیکھنے میں آرہی ہے اور نہ ہی محسوس کی جا رہی ہے، بے شک سالانہ دربار مو کی بحالی ایک مدعا ہو سکتا ہے لیکن یہ مدعا اتنا اہم نہیں جتنا کہ پیش کیا جا رہا ہے۔ مدعا یہ ہے کہ جن علاقوں میں لوگوں نے تعلیمی ،پیشاورانہ اداروں، سڑکوں کی کشادگی اورتعمیرات کے حوالے سے اپنی اراضیاں حکومت کو سونپ دی ہیں ان میں سے بیشتر یا تو معاوضوں کی ادائیگی کے منتظر ہیں یا اپنے لئے متبادل روزگار کے لئے دکانیں تعمیر کرنا چاہتے ہیں لیکن انہیں ایسا کرنے سے باز رکھا جا رہا ہے۔ کیا یہ طرز عمل ، آمریت اور استحصال نہیں؟
جموں اور کشمیر دونوں خطوں کے مشہور سیاحتی مقامات کو کنکریٹ جنگلوں میں تبدیل کیا جا رہا ہے۔ ناجائز تعمیرات کے ساتھ ساتھ ان مقامات کی زمینوں کو اونے پونے داموں فروخت کر کے ماحولیات کے ساتھ سنگین چھیڑ چھاڑ کی جا رہی ہے ۔لیکن ان سنگین نوعیت کے اشوز کو سنجیدگی سے ایڈریس کرنے کی بجائے نہ حکومت سنجیدگی دکھا رہی ہے اور نہ ہی جموںنشین اپوزیشن جس کے پاس اسمبلی میں ۲۹؍ ممبر اںکی طاقت ہے اور نہ ہی کشمیر نشین اپوزیشن سیاسی جماعتیں ۔ان سب کی بیان بازی کا محور و مرکز حکومت کے چہرے پر کوئی کالا تل تلاش کرنے تک ہی اب محدود رہ چکا ہے ۔
الیکشن کے بعد اُبھرے اس نئے منظر نامے نے کئی ایک خدشات کو بھی جنم دے دیا ہے۔ بے شک کچھ حلقے اس خیال کے ہیں کہ یہ خدشات وسوسے کے سوا اور کچھ نہیں لیکن حساس حلقے مطمئن نہیں ،ان کا ماننا ہے کہ صورتحال حکومت کیلئے Do or Dieکی سی ہے ۔اگر حکومت فوری نوعیت کے اشوز کو سنجیدگی سے نہیں لیتی اور اپنی تمام تر توجہ حاصل محدود اختیارات پر مرتکز رکھ کر اِسی پر اکتفا کرنے کا راستہ اختیار کرتی ہے توجموںو کشمیر ایک بار پھرعدم استحکام کی طرف واپس لوٹ جائے گا۔
اس سارے تناظرمیں نیشنل کانفرنس کیلئے لازمی ہے کہ وہ اپنے چنائو منشور اور عوام سے کئے وعدوں کو عملی جامہ پہنانے کیلئے کمربستہ ہوجائے اور کانگریس کا دم چھلہ بنے رہنے کی اپنی پسندیدگی پر عوام کے وسیع تر مفادات میں نظرثانی کرے۔ کشمیرکے مفادات کو کانگریس یا اپوزیشن اتحاد کی بلاک کے سیاسی مفادات کی تکمیل کیلئے قربانی کی بھینٹ نہیں چڑھایا جاسکتا ہے اور نہ کشمیر اس کا متحمل ہوسکتا ہے۔
۔۔۔۔
