امریکا باتوں کے بجائے عملی اقدامات کرے، فلسطینی صدر کی اینٹونی بلنکن سے گفتگو

غزہ///
امریکی سیکرٹری خارجہ اینٹونی بلنکن اور فلسطینی صدر محمود عباس کے درمیان گزشتہ روز ٹیلیفون پر بات چیت ہوئی۔
اینٹونی بلنکن نے اس ٹیلفونک رابطے میں اسرائیل اور فلسطین کے پُرامن رہنے اور دونوں ممالک کے درمیان کشیدگی کم کرنے کی اہمیت پر زور دیا ہے۔سیکرٹری خارجہ نے امریکا اور فلسطین کے دو طرفہ تعلقات کو بھی اجاگر کیا اور امریکی انتظامیہ کی طرف سے دو ریاستی حل کی حمایت کا اعادہ کیا۔
فلسطینی خبر ایجنسی کی رپورٹ کے مطابق، صدر محمود عباس نے اینٹونی بلنکن سے کہا کہ فلسطین لبریشن آرگنائزیشن (پی ایل او) کو دہشتگرد تنظیموں کی فہرست سے نکالا جائے۔
انہوں نے کہا کہ مشرقی یروشلم میں امریکی قونصل خانہ دوبارہ کھولا جائے اور واشنگٹن میں پی ایل او کو دفتر کھولنے کی اجازت دی جائے۔
صدر محمود عباس کا کہنا تھا کہ وقت آگیا ہے امریکا اپنی باتوں کو عملی اقدامات میں تبدیل کرے، اسرائیل کے یک طرفہ اقدامات کی مذمت کافی نہیں۔
دونوں رہنمائوں کے درمیان گفتگو ایسے وقت میں ہوئی ہے کہ جب امریکی صدر جوبائیڈن کا آئندہ ہفتوں میں خطے کا دورہ طے ہوچکا ہے۔سیکرٹری بلنکن نے کہا کہ امریکی صدر کے دورے سے قبل ایک اعلیٰ سطحی وفد محمود عباس سے ملاقات کے لیے بھیجا جائے گا۔