وزیر اعظم مودی کی انتخابی ریلی سے قبل سرینگر میں سیکورٹی بڑھا دی گئی

سرینگر//
وزیر اعظم نریندر مودی کی انتخابی ریلی سے قبل سرینگر کے شیر کشمیر پارک کے آس پاس کے علاقے کو کثیر سطحی حفاظتی حصار میں رکھا گیا ہے۔
اس مہینے کے آخر میں مرکز کے زیر انتظام علاقے میں اسمبلی انتخابات سے پہلے کشمیر میں بی جے پی امیدواروں کیلئے مودی کی یہ پہلی ریلی ہوگی۔
انسپکٹر جنرل آف پولیس (آئی جی پی) وی کے بردی نے منگل کے روز کہا’’ہم نے وی وی آئی پی کے دورے کیلئے اس طرح کی تقریبات کے لئے طے شدہ اسٹینڈرڈ آپریٹنگ پروسیجر کے مطابق ایک کثیر سطحی حفاظتی انتظامات کیے ہیں‘‘۔
یہ مقام مشہور لال چوک کلاک ٹاور سے ایک کلومیٹر کی دوری پر ہے۔بردی نے کہا کہ پولیس نے مناسب انتظامات کیے ہیں۔
آئی جی پی کشمیر نے کہا ’’ ہم باقاعدگی سے ٹریول ایڈوائزری جاری کریں گے تاکہ اس بات کو یقینی بنایا جاسکے کہ ایونٹ ہموار ہو اور لوگوں کو کم سے کم تکلیف کا سامنا کرنا پڑے‘‘۔
عہدیداروں نے بتایا کہ وزیر اعظم کی ریلی کے مقام کی طرف جانے والی سڑکوں پر بڑی تعداد میں سیکورٹی اہلکاروں کو تعینات کیا گیا ہے۔انہوں نے بتایا کہ پولیس اور نیم فوجی دستوں نے درجنوں مقامات پر گاڑیوں کی بے ترتیب چیکنگ تیز کردی ہے اور خصوصی چیک پوائنٹس قائم کیے گئے ہیں۔
سکیورٹی فورسز نے علاقے پر غلبہ حاصل کرنے کی مشق کے ایک حصے کے طور پر مقام کے ارد گرد گشت میں اضافہ کیا ہے۔
اس سال وزیر اعظم کا وادی کشمیر کا یہ تیسرا دورہ ہوگا۔ انہوں نے۷مارچ کو بخشی اسٹیڈیم میں ایک ریلی سے خطاب کیا اور ۲۱جون کو ایس کے آئی سی سی میں بین الاقوامی یوم یوگا میں شرکت کی۔ (ایجنسیاں)