محبوبہ مفتی کی صاحب زادی التجا نے بھی کاغذات نامزدگی داخل کئے

سرینگر//
پیپلز ڈیموکریٹک پارٹی (پی ڈی پی) کی سربراہ محبوبہ مفتی کی بیٹی التجا مفتی نے منگل کو جنوبی کشمیر کے بجبہاڑہ حلقہ سے پرچہ نامزدگی داخل کرکے باضابط طورپر سیاست میں قدم رکھا۔
التجا نے اس موقع پر کہاکہ جموںکشمیر کے لوگوں کو انصاف فراہم کرنے کی خاطر پی ڈی پی کوئی دقیقہ فروگزاشت نہیں کرے گی۔انہوں نے کہا کہ پارٹی نے مجھے بجبہاڑہ اسمبلی حلقے سے منڈیٹ دیا ہے ۔
پی ڈی پی امیدوار نے کہاکہ مرحوم مفتی محمد سعید اور محبوبہ مفتی نے اپنی سیاست کا آغاز بجبہاڑہ سے کیا اور آج میں نے بھی یہی سے اپنا سیاسی سفر شروع کیا ہے ۔
التجا نے کہا ’’ آج یہ میرے لیے جذباتی لمحہ ہے اور لوگوں کی توقعات پر کھرا اترنے کی پوری کوشش کروں گی‘‘۔
ان کا مزید کہنا تھا کہ محبوبہ مفتی نے عہد کیا ہے کہ ریاستی درجے کی بحالی تک وہ اسمبلی انتخابات میں حصہ نہیں لے گی۔
بتادیں کہ التجا مفتی پی ڈی پی صدر محبوبہ مفتی کی صاحبزادی ہے سال ۲۰۱۹میں التجا مفتی اُس وقت سوشل میڈیا پر چھائی رہی جب محبوبہ مفتی کی نظر بندی کے بعد اُس نے پی ڈی پی کی کمان سنبھالی۔
زائد از ایک سال تک التجا نے اپنی والد ہ کے سوشل میڈیا اکاونٹس کے ذریعے جموں وکشمیر انتظامیہ کی غلط پالیسیوں کے خلاف آواز بلند کی ۔
لوک سبھا انتخابات کے دوران التجا مفتی نے اپنی والدہ کی جیت کی خاطر اننت ناگ پارلیمانی نشست پر الیکشن مہم چلائی تاہم اس کے باوجود بھی محبوبہ مفتی کو ہار کا منہ دیکھنا پڑا۔