ویمنز ٹی 20 ورلڈ کپ کے شیڈول کا اعلان ، پاک بھارت ٹاکرا دبئی میں ہوگا

دبئی//) انٹرنیشنل کرکٹ کونسل نے ویمنز ٹی 20 ورلڈ کپ کے شیڈول کا اعلان کر دیا۔ آئی سی سی کی جانب سے جاری ہونیوالے شیڈول کے مطابق ایونٹ میں 10 ٹیموں کو دو گروپوں میں تقسیم کیا گیا ہے، گروپ اے میں پاکستان سمیت بھارت، آسٹریلیا، نیوزی لینڈ اور سری لنکا کی ٹیمیں شامل ہیں جب کہ گروپ بی میں جنوبی افریقہ، انگلینڈ، ویسٹ انڈیز، بنگلا دیش اور سکاٹ لینڈ کی ٹیمیں شامل ہیں، پاکستان ویمنز ٹیم اپنی مہم کا آغاز 3 اکتوبر کو سری لنکا کے خلاف شارجہ میں کرے گی، قومی ویمنز ٹیم اپنا دوسرا میچ روایتی حریف بھارت کے خلاف 6 اکتوبر کو دبئی میں کھیلے گی، تیسرا میچ میں 11 اکتوبر کو آسٹریلیا کیخلاف جب کہ گروپ مرحلے کا آخری میچ 14 اکتوبر کو نیوزی لینڈ کے خلاف کھیلے گی۔
ایونٹ کے سیمی فائنل مقابلے 17 اور 18 اکتوبر کو دبئی اور شارجہ میں کھیلے جائیں گے، ویمنز ٹی ٹوئنٹی ورلڈکپ کا فائنل 20 اکتوبر کو دبئی میں کھیلا جائے گا، ایونٹ سے قبل 28 ستمبر سے یکم اکتوبر تک وارم اپ میچز بھی کھیلے جائیں گے۔