کانگریس ہر اس پارٹی سے ہاتھ ملائے گی جو بی جے پی مخالف ہے :قرہ

جموں//
جموںکشمیر پردیش کانگریس کمیٹی کے صدر‘ طارق حمید قرہ کا کہنا ہے کہ کانگریس ہر اس پارٹی کے ساتھ ہاتھ ملانے کیلئے تیار ہے جو بی جے پی کی پالیسیوں کے خلاف ہے ۔
قرہ نے ساتھ ہی کہا کہ ایسی جماعتوں کے ساتھ بات چیت کرنے کیلئے ہمارے دروازے ہمیشہ کھلے ہیں۔
کانگریسی یونٹ صدر نے ان باتوں کا اظہار منگل کے روز یہاں نامہ نگاروں کے ساتھ بات کرنے کے دوران کیا۔
قرہ نے کہا’’کانگریس کی پالیسی واضح ہے ہم ہر اس طاقت، جماعت یا شخص کے ساتھ ہاتھ ملانے کے لئے تیار ہیں جو بی جے پی اور اس کی پالیسیوں کے خلاف ہیں، ایسی جماعتوں کے ساتھ بات چیت کرنے کیلئے ہمارے دروازے ہمیشہ کھلے ہیں‘‘۔
کانگریس کی طرف سے انتخابی منشور جاری کرنے کے بارے میں ان کا کہنا تھا’’جب ہم منشور جاری کریں گے تو لوگ دیکھیں گے کہ اس میں کیا ہے اور پارٹی کے سینئر لیڈر آپس میں بات چیت کرکے اس کو تیار کریں گے ‘‘۔
راہل گاندھی کے دورہ جموں وکشمیر کے بارے میں پوچھے جانے پر قرہ نے کہا’’راہل جی کا دورہ جموں کشمیر پہلے ہی طے پایا تھا ہم نے الیکشن کے اعلان سے پہلے ان سے یہاں انے کی دعوت دی تھی‘‘۔
قرہ نے کہا’’راہل جی کی میٹنگ ایک عمومی میٹنگ ہوگی۔‘‘