ریاسی حملہ:ملوث ملی ٹنٹ کا خاکہ جاری‘

جموں//
جموںکشمیر پولیس نے ریاسی بس حملے میں ملوث ملی ٹنٹ کا خاکہ جاری کیا ہے اور اس کے متعلق اطلاع دینے والے کو ۲۰لاکھ روپے انعام دینے کا اعلان کیا ہے ۔
بتادیں کہ ریاسی ضلع کے کانڈا علاقے میں اتوار کی شام ملی ٹنٹوں نے ایک یاترا گاڑی پر فائرنگ کر دی جس کے نتیجے میں۹یاتری جاں بحق جبکہ ۳۳دیگر زخمی ہوگئے ۔
ایک پولیس ترجمان نے بتایا کہ ریاسی پولیس نے اس حملے میں ملوث دہشت گرد کا خاکہ جاری کیا ہے اور اس کے بارے میں اطلاع فراہم کرنے والے کو۲۰لاکھ روپیوں کا انعام دینے کا اعلان کیا ہے ۔
انہوں نے کہا کہ دہشت گرد کا خاکہ عینی شاہدین کی طرف سے فراہم تفصیلات کی بنیادوں پر تیار کیا گیا ہے ۔
دریں اثنا ریاسی حملے میں ملوث دہشت گرد کی تلاش کے لئے علاقے میں وسیع پیمانے پر آپرہشن جاری ہے اور سیکورٹی فورسز کی ۱۱ٹیمیں کام پر لگی ہوئی ہیں۔
ادھرجموں وکشمیر کے کٹھوعہ ضلع کے ہیرا نگر علاقے میں درمیانی شب ڈی آئی جی اور ایس ایس پی رینک کے دو آفیسر اس وقت بال بال بچ گئے جبکہ ملی ٹینٹوں نے ان کی گاڑی پر فائرنگ کی جس کے نتیجے میں دو گولیاں شیشے کو جالگیں ۔
اطلاعات کے مطابق جموں کے کٹھوعہ ضلع کے ہیرا نگر علاقے میں درمیانی شب جوں ہی انکاونٹر شروع ہوا تو جموں وکشمیر پولیس سے وابستہ ڈی آئی جی اور ایس ایس بی بھی جائے موقع پر پہنچے ۔
ذرائع نے بتایا کہ تاک میں بیٹھے ملی ٹینٹ نے ڈی آئی جی اور ایس ایس پی کی گاڑی پر بھی فائرنگ کی جس وجہ سے دو گولیاں گاڑی کے سامنے والے شیشے کو جالگیں۔
باوثوق ذرائع نے بتایا کہ ڈی آئی جی اور ایس ایس پی اس حملے میں معجزاتی طورپر بچ نکلنے میں کامیاب ہوئے ۔