وزیراعظم کا دورہ حیدرآباد۔وسیع تر سیکوریٹی انتظامات

حیدرآباد// وزیراعظم نریندرمودی کے دورہ حیدرآبادکے سلسلہ میں وسیع تر سیکوریٹی انتظامات کئے جارہے ہیں۔مودی 26مئی کو تلنگانہ کے دارالحکومت میں انڈین اسکول آف بزنس (آئی ایس بی)کی 20ویں یوم تاسیس میں شرکت کریں گے اورطلبہ سے خطاب بھی کریں گے۔ وزیراعظم شجرکاری کریں گے،یادگاری تختی کی نقاب کشائی انجام دیں گے اورآئی ایس بی کے مائی اسٹامپ و خصوصی لفافہ کو جاری کریں گے۔وزیراعلی تلنگانہ کے بنگالورو دورہ کے پیش نظر چیف سکریٹری سومیش کمار،وزیراعظم کا استقبال کریں گے۔ان کے دورہ کے سلسلہ میں سخت سیکوریٹی انتظامات کئے جارہے ہیں۔پولیس نے ٹریفک تحدیدات بھی عائد کردی ہیں۔اندرون تین ماہ وزیراعظم کا شہرحیدرآباد کا یہ دوسرا دورہ ہے۔جاریہ سال 5فروری کو انہوں نے شہر کے نواحی علاقہ مُنچٹل میں مساوات کے مجسمہ کی نقاب کشائی انجام دی تھی۔وزیراعظم کا بی جے پی کی ریاستی قیادت کی جانب سے شاندار استقبال کیاجائے گا۔