سونہ مرگ کے ہنگ علاقے میں برفانی تودا گر آیا

سرینگر//
سیاحتی مقام سونہ مرگ کے ہنگ علاقے میں ایک بھاری برکم برفانی تودا گرآیا جس کی زد میں دو گاڑیاں آئیں تاہم ریسکیوٹیم کی بروقت کارروائی کے نتیجے میں گاڑی میں موجود مسافروں کو بچایاگیا۔
اطلاعات کے مطابق جمعے بعد دوپہر سونہ مرگ کے ہنگ علاقے میں اس وقت سنسنی کا ماحول پھیل گیا جب یہاں اچانک برفانی تودا گر آیا ۔
معلوم ہوا ہے کہ برفانی تودے کی زد میں دو گاڑیاں آئیں جن میں سوار مسافروں کو وقت رہتے محفوظ جگہ منتقل کیا گیا۔
سرکاری ذرائع نے بتایا کہ ایس ایس پی گاندربل کی ہدایت پر پولیس ٹیم فوری طورپر جائے موقع پر پہنچی اور گاڑی میں موجود لوگوں کو بچا لیا گیا۔
اس دوران جموں وکشمیر ڈزاسٹر مینجمنٹ اتھارٹی (جے کے ڈی ایم اے ) نے جمعہ کے روز وادی کشمیر کے چار اضلاع میں اگلے چوبیس گھنٹوں کے دوران برفانی تودے گر آنے کی وارننگ جاری کی ہے ۔
ڈزاسٹر مینجمنٹ اتھارٹی کے ایک ترجمان نے جمعہ کو بتایا کہ وادی کشمیر کے کپوارہ، بانڈی پورہ، بارہمولہ اور گاندر بل اضلاع میں اگلے چوبیس گھنٹوں کے دوران برفانی تودے گر آنے کا امکان ہے ۔
حکام نے لوگوں سے احتیاط برتنے کی تاکید کی ہے اور جن علاقوں میں برفانی تودے گر آنے کے خطرات رہتے ہیں وہاں جانے سے اجتناب کرنے کو کہا ہے ۔
بتادیں کہ وادی کشمیر میں بارشوں کا سلسلہ جاری ہے اور محکمہ موسمیات کے مطابق بارشوں کا یہ سلسلہ اگلے چوبیس گھنٹوں کے دوران بھی جاری رہنے کا امکان ہے ۔