ناردھن ریڈی کے بی جے پی میں شامل ہونے پر کانگریس ناراض

نئی دہلی// کانگریس نے کرناٹک کے کلیان راجیہ پرگتی پکشا کے ممبر اسمبلی جی جناردھن ریڈی کے بھارتیہ جنتا پارٹی (بی جے پی) میں شامل ہونے پر سخت ردعمل ظاہر کرتے ہوئے کہا ہے کہ کان کنی کے مافیا کو پارٹی میں شامل کرکے بی جے پی نے یہ ظاہر کردیا ہے کہ وہ مافیا کی سرپرست ہے اور کرپشن کو پروان چڑھاتی ہے ۔
کانگریس کمیونیکیشن ڈپارٹمنٹ کے سربراہ پون کھیڑا نے بدھ کو یہاں پارٹی ہیڈکوارٹر میں ایک پریس کانفرنس میں کہا کہ بڑا سوال یہ ہے کہ مسٹر ریڈی کے خلاف 20 مقدمات زیر التوا ہیں اور بدعنوانی کے بے شمار ثبوت ہونے کے باوجود انہیں بچایا جا رہا ہے ۔ حکومت کو بتانا چاہیے کہ جب ان کے خلاف ثبوت موجود ہیں تو ان کے لیے ریڈ کارپیٹ کیوں بچھایا جا رہا ہے ۔
مسٹر کھیڑا نے سوال کیا کہ "کیا مودی حکومت اس قدم سے بدعنوانی کو ختم کرنے کے اپنے دعوے کو کھوکھلا نہیں کر رہی ہے ؟ وزیر اعظم نریندر مودی ہمیشہ کہتے ہیں کہ میں ‘جنتا جناردن’ کے لیے انتھک جدوجہد کر رہا ہوں، وہ عوام کے لیے جدوجہد کرتے کبھی نظر نہیں آتے لیکن جناردھن ریڈی کے لئے جدوجہد کرتے ضرور نظر آرہے ہیں۔ ریڈی پر 35 ہزار کروڑ روپے کے گھوٹالہ کا الزام ہے اور ان کے خلاف سی بی آئی سمیت 20 کیس زیر التوا ہیں۔ انہوں نے غیر قانونی کان کنی کرکے جنگلات اور کانوں کو برباد کیا ہے ۔
کانگریس کے ترجمان نے کہا کہ یہ وہی جناردھن ریڈی ہیں ، جن کے بارے میں ایک جج نے کہا تھا کہ انہوں نے ضمانت حاصل کرنے کے لیے 40 کروڑ روپے کی رشوت کی پیشکش کی تھی۔ بیلاری برادرز ، ہم یہ نام تین دہائیوں سے سن رہے ہیں۔ سال 1998 میں انہوں نے سشما سوراج جی کے الیکشن کی تمام ذمہ داریاں سنبھال لیں اور انتخابات کے بعد بی جے پی نے انہیں سنبھال لیا۔ مسٹر یدی یورپا اور ان کی جگل بندی مشہور ہے اور اس جگل بندی کی وجہ سے لوہے کی ایسی لوٹ مار اور غیر قانونی کان کنی ہوئی کہ ‘یدی-ریڈی گینگ’ مشہور ہو گیا۔ پھر 2011 سے 2017 کے درمیان انہیں کئی بار گرفتار کیا گیا۔
مسٹر پون کھیڑا نے کہا "اب جبکہ وہ بی جے پی میں شامل ہو گئے ہیں، سی بی آئی انہیں ایسی کلین چٹ دے گی کہ ہر داغ مٹ جائے گا۔ جیسے ہی وہ بی جے پی میں شامل ہوئے ، جناردھن ریڈی نے کہا – میں اپنی جڑوں میں واپس آ گیا ہوں۔ سمجھیں کہ ان کی بدعنوانی کی جڑیں کہاں ہیں ؟ بی جے پی کا پلان بی انتخابی بانڈز کو غیر قانونی قرار دینے کے بعد جناردھن ریڈی کو پارٹی میں شامل کرنا ہے ۔ اس کا مطلب ہے کہ اب براہ راست شراکت… ہم کھائیں گے اور کھلائیں گے ۔”