سرینگر//
جموں وکشمیر کی گرمائی راجدھانی سری نگر کے باراں پتھر بٹہ مالو علاقے میں شام دیر گئے آتشزدگی کی بھیانک واردات میں تین رہائشی مکان خاکستر ہوئے جبکہ آگ بجھانے کی کارروائی کے دوران انچارج سٹی سمیت دو اہلکار زخمی ہوئے جنہیں علاج ومعالجہ کی خاطر نزدیکی ہسپتال منتقل کیا گیا۔
اطلاعات کے مطابق سری نگر کے گنجان آبادی والے علاقے باراں پتھر بٹہ مالو میں رات نو بجے کے قریب رہائشی مکان سے آگ نمودار ہوئی جس نے آناً فاناً اپنے متصل مزید دو مکانوں کو لپیٹ میں لے لیا۔
معلوم ہوا ہے کہ فائر اینڈ ایمرجنسی اور مقامی لوگوں کی بروقت کارروائی کے نتیجے میں گر چہ آگ پر قابو پایا گیا تاہم آتشزدگی کی اس واردات میں تین رہائشی مکان خاکستر ہوئے ہیں۔
مقامی لوگوں نے بتایا کہ رمضان المبارک کے پیش نے لوگ مساجد میں تروایح کی نماز ادا کر رہے تھے کہ اسی اثنا میں رہائشی مکان سے آگ نمودار ہوئی اور چندمنٹوں کے اندر اندر ہی آگ کے شعلوں نے تین مکانوں کو لپیٹ میں لے لیا۔انہوں نے بتایا کہ آگ کی اس واردات میں لاکھوں روپیہ مالیت کی گھریلو املاک راکھ کے ڈھیر میں تبدیل ہوئی۔
فائر اینڈ ایمرجنسی کے ایک عہدیدار نے یو این آئی اردو کو بتایا کہ باراں پتھر بٹہ مالو میں شام ۸بجکر۴۵منٹ پر رہائشی مکان سے آگ نمودار ہونے کی اطلاع موصول ہوتے ہی فائر اینڈ ایمرجنسی کے اہلکار جائے موقع پر پہنچے۔انہوں نے بتایا کہ تنگ گلیوں اور گنجان آبادی کے باوجود بھی فائر اینڈ ایمرجنسی کے اہلکاروں نے اپنی جانوں کو جوکھم میں ڈال کر آگ بجھانے کی کارروائی شروع کی اور دس فائر ٹینڈروں کی مدد سے آگ پر قابو پایا گیا۔
دریث اثنامحکمہ فائر اینڈ ایمرجنسی کے ایک عہدیدار نے بتایا کہ سری نگر کے نو پور علاقے میں شبانہ آگ کی ایک واردات میں دو رہائشی مکان خاکستر ہوگئے ۔
عہدیدار نے کہا کہ نو پورہ علاقے میں اتوار کی رات دس بجے آگ نے ایک دو منزلہ مکان کو اپنی لپیٹ میں لے لیا۔انہوں نے کہا کہ اطلاع موصول ہوتے ہی فائر ٹنڈرس جائے واردات پر پہنچے اور آگ کو قابو میں کر لیا گیا تاہم اس وار دات میں دو رہائشی مکانوں کو نقصان پہنچا۔
ان کا کہنا تھا کہ آگ لگنے وجوہات معلوم کی جا رہی ہیں تاہم اس وار دات میں کسی جانی نقصان کی کوئی اطلاع نہیں ہے ۔
ادھر شمالی کشمیر کے ضلع بارہمولہ کے کنزر علاقے میں بھی آتشزدگی کی واردات میں دو رہائشی مکان خاکستر ہوگئے ۔
سرکاری ذرائع نے بتایا کہ کنزر کے بانی پائین علاقے میں آگ کی ایک وادات میں دو رہائشی مکانوں کو نقصان پہنچا۔
انہوں نے کہا کہ آگ لگنے کی وجوہات معلوم کی جا رہی ہیں تاہم اس واردات میں کسی جانی نقصان کی کوئی اطلاع نہیں ہے ۔