سرینگر//
وادی کشمیر کو ملک کے باقی حصوں کے ساتھ جوڑنے والی سرینگر، جموں قومی شاہراہ پر منگل کے روز کچھ گھنٹوں تک متاثر رہنے کے بعد ٹریفک کی نقل و حمل بحال کر دی گئی۔
جموں وکشمیر ٹریفک پولیس نے ’ایکس‘پر ایک پوسٹ کے ذریعے جانکاری فراہم کرتے ہوئے کہا کہ سرینگر ، جموں قومی شاہراہ پر ڈھلواس کے مقام پر ٹریفک بحال کر دیا گیا ہے ۔
ٹریفک پولیس نے کہا’’ڈھلواس پر سڑک کی سطح خراب ہونے اور سنگل لین کی وجہ سے ٹریفک کی نقل و حمل سست ہے ‘‘۔انہوں نے لوگوں سے لین ڈسپلین پر عمل کرنے اور اوور ٹیکنگ سے احتراز کرنے کی تاکید کی۔
قبل ازیں جموں وکشمیر ٹریفک پولیس نے بتایا کہ قومی شاہراہ پر ڈھلواس کے مقام پر سڑک کی سطح کو بہتر بنانے کے لئے مٹی کو ہٹایا جا رہا ہے جس کی وجہ سے ٹریفک کی نقل و حمل روک دی گئی ہے ۔انہوں نے لوگوں سے ٹریفک پولیس کے ساتھ تعاون کرنے کو کہا ہے ۔
دریں اثنا جنوبی کشمیر کے ضلع شوپیاں کو صوبہ جموں کے پونچھ اور راجوری کے ساتھ جوڑنے والا تاریخی مغل روڈ اور سرینگر، لیہہ شاہراہ پر ٹریفک مسلسل بند ہے ۔
اس دوران محکمہ موسمیات کی پیش گوئی کے عین مطابق وادی کشمیر کے سیاحتی مقام گلمرگ سمیت کئی پہاڑی علاقوں میں ہلکی برف باری ہوئی۔سرینگر سمیت وادی کے دوسرے میدانی علاقوں میں دن بھر کھلکھلاتی دھوپ رہی ۔
حکام کے مطابق سیاحتی مقام گلمرگ میں گذشتہ چوبیس گھنٹوں کے دوران۲سینٹی میٹر تازہ برف ریکارڈ کی گئی ہے جبکہ سرینگر میں اس دوران معمولی بوندا باندی ہوئی۔
انہوں نے کہا کہ پہلگام میں گذشتہ چوبیس گھنٹوں کے دوران۶ء۰سینٹی میٹر بارش ریکارڈ کی گئی جبکہ کپوارہ میں ۲ء۰ملی میٹر اور کوکر ناگ میں۲ء۱ملی میٹر بارش ریکارڈ ہوئی ہے ۔
ادھر محکمہ موسمیات کے ایک ترجمان کے مطابق وادی میں اگلے چوبیس گھنٹوں کے دوران ہلکی سے درمیانی درجے کی بارشوں یا برف باری کا امکان ہے ۔
ترجمان نے کہا کہ وادی میں۱۳مارچ کو ہلکی سے درمیانی درجے کی برف باری یا بارشیں ہوسکتی ہیں اور اس دوران گرج چمک کے ساتھ تیز ہوائیں بھی چل سکتی ہیں۔
ان کا کہنا تھا کہ بعد ازاں وادی میں۱۴سے۲۰مارچ تک موسم مجموعی طور پر خشک رہنے کا امکان ہے ۔
دریں اثنا وادی کے شبانہ درجہ حرارت میں کہیں گراوٹ تو کہیں اضافہ درج ہوا ہے ۔
گرمائی دارالحکومت سری نگر میں کم سے کم درجہ حرارت۹ء۵ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت۳ء۶ڈگری سینٹی گریڈ ریکارڈ ہوا تھا۔
سیاحتی مقام گلمرگ میں کم سے کم درجہ حرارت منفی۶ء۱ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی۰ء۱ڈگری سینٹی گریڈ ریکارد ہوا تھا۔
ایک اور مشہور سیاحتی مقام پہلگام میں کم سے کم درجہ حرارت۷ء۱ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت۲ء۲ڈگری سینٹی گریڈ ریکارڈ ہوا تھا۔
شمالی ضلع کپوارہ میں کم سے کم درجہ حرارت۰ء۴ڈگری سینٹی گریڈ ریکارڈ کیا گیا جہاں گذشتہ شب بھی یہی درجہ حرارت ریکارڈ ہوا تھا۔
قصبہ قاضی گنڈ میں کم سے کم درجہ حرارت۸ء۵ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت۴ء۴ڈگری سینٹی گریڈ ریکارڈ ہوا تھا۔