جموں//
جموںکشمیر کے ضلع اودھم پور میں قومی شاہراہ پر ایک سڑک حادثے میں موٹر سائیکل پر سوار تین افراد کی موت واقع ہوئی۔
ذرائع نے بتایا کہ اودھم پور میں قومی شاہراہ پر گرنائی کے نزدیک ایک ٹرک اور ایک موٹر سائیکل کے درمیان زور دار ٹکر ہوئی جس کے نتیجے میں موٹر سائیکل پر سوار تین افراد کی موت واقع ہوئی۔
ذرائع نے کہا کہ حادثہ پیش آنے کے بعد پولیس کی ایک ٹیم جائے واردات پر پہنچی اور زخمیوں کو ہسپتال منتقل کیا جہاں ڈاکٹروں نے ان میں سے دو کو مردہ قرار دیا جبکہ تیسرے کو میڈیکل کالج جموں ریفر کیا گیا لیکن وہ بھی زخموں کی تاب نہ لا کر راستے میں ہی دم توڑ گیا۔
متوفین کی شناخت شہزاد حسین ولد عبدالعزیز ساکن چنیاس ڈوڈہ، مبشر حسین ولد غلام محمد ساکن گنڈانہ ڈوڈہ اور ومل کمار ولد رام ناتھ ساکن ٹھاٹھری ڈوڈہ کے طور پر ہوئی ہے ۔
دریں اثنا پولیس نے اس سلسلے میں ایک کیس درج کرکے مزید تحقیقات شروع کی ہے۔
اس دوران جنوبی کشمیر کے ضلع اننت ناگ کے اچھہ بل علاقے میں منگل کی سہ پہر ایک سڑک حادثے میں ایک خاتون کی موت ہو گئی جبکہ اس کا شوہر زخمی ہو گیا۔
میڈیا رپورٹس کے مطابق نوگام اچھہ بل کے مقام پر یہ حادثہ اس وقت پیش آیا جب ایک گاڑی نے سیدہ بیگم اور ان کے شوہر اب احد وانی کو ٹکر مار دی۔
انہوں نے بتایا کہ دونوں کو ایس ڈی ایچ اسپتال اچھہ بل لے جایا گیا جہاں۵۵ سالہ سیدہ بیگم کو مردہ قرار دے دیا گیا جبکہ ۶۰ سالہ اب احد وانی کو مزید علاج کے لئے جی ایم سی اننت ناگ ریفر کردیا گیا۔
دریں اثنا پولیس نے نوٹس لیتے ہوئے تحقیقات شروع کردی ہے۔