طیب اردگان کا 31 مارچ کے انتخابات کے بعد الیکشن میں حصہ نہ لینے کا اعلان

انقرہ//
ترکیہ کی سرکاری خبر رساں ایجنسی ’انادول‘ نے صدر رجب طیب ایردوآن کے حوالے سے کل جمعہ کو کہا کہ 31 مارچ کو ہونے والے بلدیاتی انتخابات ان کے آخری انتخابات ہوں گے۔
ترکیہ کی جدید تاریخ میں سب سے زیادہ انتخابی فتوحات کے حامل سیاستدان ایردوآن دو دہائیوں سے زیادہ عرصے سے ملک کی قیادت کر رہے ہیں۔
وہ 2002ء سے اب تک ایک درجن سے زیادہ انتخابات جیت چکے ہیں اور مئی 2023 میں ہونے والے انتخابات کے دوران پانچ سال کی مدت کے لیے دوبارہ منتخب ہوئے تھے۔
ایردوآن نے کہا کہ "یہ میرے آخری انتخابات ہیں اور قانون کی طرف سے دیے گئے مینڈیٹ کے تحت یہ میرے آخری انتخابات ہیں۔ ان سے جو نتیجہ سامنے آئے گا وہ میرے بھائیوں کو میراث کی منتقلی ہے‘‘۔
ترکیہ میں 31 مارچ کو بلدیاتی انتخابات ہونے والے ہیں۔ اس کے بعد مختلف جماعتوں نے ہفتہ قبل سب سے بڑی بلدیات کی صدارت کے لیے اپنے امیدواروں کا انتخاب کیا تھا۔
چونکہ حزب اختلاف کی مرکزی جماعت 2019ء کے انتخابات میں استنبول اور انقرہ میں حکمران اتحاد کے امیدواروں کو بے دخل کرنے میں کامیاب ہوئی تھی۔ اس لیے جسٹس اینڈ ڈیولپمنٹ پارٹی اگلے ماہ کے آخر میں ہونے والے اگلے انتخابات میں ان بلدیات کی صدارت دوبارہ حاصل کرنے کی کوشش کر رہی ہے۔