پی ڈی پی، این سی کیخلاف آگ اگل رہی ہے‘ساتھ نہیں دے سکتے ہیں

سرینگر//
جموں وکشمیر نیشنل کانفرنس کے نائب صدر عمر عبداللہ نے جمعہ کو کہاکہ پیپلز ڈیموکریٹک پارٹی( پی ڈی پی) براہ راست این سی پر تنقید کر رہی ہے ۔
عمر نے کہاکہ پی ڈی پی اپنی ریلیوں میں ہل ہٹاو جیسے نعرے لگا رہی ہے لہذا ہم اس پارٹی کا ساتھ کیوں دیں۔
ان باتوں کا اظہار این سی کے نائب صدر نے سرینگر میں نامہ نگاروں سے بات چیت کے دوران کیا۔
نیشنل کانفرنس کے نائب صدر نے کہاکہ انڈیا الائنس کا حصہ بننے کا مقصد بی جے پی کے خلاف لڑنا تھا ۔
عمر نے کہاکہ پی ڈی پی براہ راست این سی پر تنقید کر رہی ہے اور یہاں تک ڈاکٹر فاروق عبداللہ کے خلاف بھی ہر زہ سرائی کرنے سے گریز نہیں کر رہی ہے ۔
این سی نائب صدر نے مزید بتایا کہ پی ڈی پی اپنی ریلیوں میں ہل ہٹاو جیسے نعرے لگا کر نیشنل کانفرنس کے خلاف آگ اگل رہی ہیں لہذا ہم پی ڈی کا ساتھ کیوں دیں گے ۔
ان کے مطابق پی ڈی پی ڈاکٹر فاروق عبداللہ پرراست تنقید کرنے کی جرأت کر رہی ہے جو کہ ناقابل برداشت ہے۔
یہ سوال پوچھے جانے پر این سی نے پی ڈی پی کو آؤٹ کیا کے جواب میں عمر عبداللہ نے کہاکہ پی ڈی پی کو ہم نے آؤ ٹ نہیں کیا بلکہ حالات نے اس سے الگ کیا۔انہوں نے کہاکہ پی ڈی پی جنوبی کشمیر کی پارلیمانی نشست پر لڑنا چاہتی ہے لیکن جو پارٹی پچھلے الیکشن میں یہاں پر پہلی اور دوسرے نمبر پر آئی وہ کیوں سیٹ چھوڑے ۔
عمر نے بتایا کہ غلام نبی آزاد فاروق عبداللہ کو تنقید کا نشانہ بناتے ہیں تو پی ڈی پی لیڈران اس بیان کی تائید کرتے ہیں ۔
ان کے مطابق جب تک پی ڈی پی اپنی حرکتوں سے باز نہیں آتی اس کے ساتھ بات نہیں بنے گی۔انہوں نے مزید کہاکہ حیرانگی کی بات یہ ہے کہ پچھلے لگاتار دو سالوں سے پی ڈی پی بی جے پی کے بجائے این سی کو تنقید کا نشانہ بنا رہی ہے۔