زائد از دو لاکھ لوگوں نے مودی جی کا استقبال کیا: رینا

سرینگر//
جموں کشمیر بی جے پی یونٹ کے صدر‘ رویندر رینا نے جمعرات کے روز کہاکہ وزیر اعظم نریندر مودی کے جلسے میں لوگوں کی بھاری شرکت سے یہ عیاں ہو رہا ہے کہ اس بار کشمیر میں کنول کا پھول ضرور کھلے گا۔
رینا نے کہاکہ بخشی اسٹیڈیم کے اندر اور باہر تل دھرنے کی بھی جگہ نہیں تھی اور جس طرح سے کشمیریوں نے وزیر اعظم کا استقبال کیا اس کی جتنی بھی تعریف کی جائے کم ہے ۔
ان باتوں کا اظہار رینا نے سرینگر میں نامہ نگاروں سے بات چیت کے دوران کیا۔
رینا نے کہاکہ کشمیر کے لوگوں نے وزیر اعظم مودی کا والہانہ استقبال کیا ہے ۔انہوںنے کہاکہ مودی جی نے جموںکشمیر میں تعمیر وترقی کا جال بچھانے‘ لوگوں کے مسائل حل کرنے کی خاطر زمینی سطح پر اقدامات اٹھائے ہیں۔
ان کے مطابق کشمیر سے کنیا کماری تک بہت جلد ریل سروس شروع ہو گی ، کشمیر میں ایمز ہسپتال پر کام جاری ہے ۔انہوں نے مزید بتایا کہ کشمیر امن و امان کے قیام کی خاطر وزیر اعظم مودی کی سربراہی میں سرکار نے جو پالیسی اپنائی اس کی مثبت نتائج سامنے آرہے ہیں۔
رینا نے کہاکہ مودی جی کی ریلی میں زائد از دو لاکھ لوگوں نے شرکت کی‘ اسٹیڈیم کے اندر اور باہر لوگوں کا رش دیدنی تھا۔ان کے مطابق بھاجپا جموں وکشمیر میں اسمبلی چناو کے لئے پوری طرح سے تیار ہے اور اس بار کشمیر میں کنول کا پھول ضرور کھلے گا۔
بی جے پی یونٹ صدر نے مزید بتایا کہ موجودہ وزیر اعظم کی سربراہی میں جموں وکشمیر میں امن و امان واپس لوٹ آیا ، بھائی چارے کو مضبوط بنانے کی خاطر بھی زمینی سطح پر کام کیا گیا۔
رینا کے مطابق آنے والے پارلیمانی چناو میں بھاجپا جموں وکشمیر کی پانچ نشستوں پر کامیابی حاصل کرئے گی۔