نئی دہلی//
بھارتیہ جنتا پارٹی (بی جے پی) نے۱۸ویں لوک سبھا انتخابات کیلئے ہفتہ کو۱۹۵؍امیدواروں کی پہلی فہرست کا اعلان کیا، جس میں وزیر اعظم نریندر مودی اور وزیر داخلہ امت شاہ، لوک سبھا اسپیکر اوم برلا سمیت۳۴کابینی اور ریاستی وزراء ، اور دو سابق وزرائے اعلیٰ کے نام شامل ہیں۔
۲۹فروری کو پارٹی کے مرکزی دفتر میں وزیر اعظم مودی کی موجودگی میں اور بی جے پی صدر جگت پرکاش نڈا کی صدارت میں منعقدہ پارٹی کی مرکزی الیکشن کمیٹی کی پوری رات چلی میٹنگ میں ان ناموں کو منظوری دی گئی۔
بی جے پی کے جنرل سکریٹری ونود تاوڑے اور پارٹی کے نائب صدر بیجینت پانڈا نے آج یہاں بی جے پی کے مرکزی دفتر میں ان ناموں کا اعلان کیا اور کہا’’عوام کے آشیرواد سے مسلسل تیسری بار پچھلی دو بار اکثریت کے ساتھ عوام کی امنگوں پر پورا اترنے والی حکومت پھر سے بنے گی۔ پورے ملک سے آواز آرہی ہے کہ ایک بار پھر مودی حکومت ‘‘۔
تاوڑے نے کہا کہ یہ۱۹۵سیٹیں۱۶ریاستوں اور دو مرکز کے زیر انتظام علاقوں کی ہیں۔ وزیر اعظم نریندر مودی وارانسی سے تیسری بار امیدوار ہوں گے ۔ وزیر داخلہ امت شاہ گاندھی نگر سے ، لوک سبھا کے اسپیکر اوم برلا راجستھان کی کوٹا سیٹ سے اور وزیر دفاع راج ناتھ سنگھ لکھنؤ سے دوبارہ امیدوار ہوں گے ۔
مدھیہ پردیش کے سابق وزیر اعلی شیوراج سنگھ چوہان کو ودیشا سے میدان میں اتارا گیا ہے جہاں سے وہ پہلے ایم پی رہ چکے ہیں۔
بی جے پی کے جنرل سیکریٹری نے کہا کہ اس فہرست میں۳۴مرکزی وزیر اور دو سابق وزرائے اعلیٰ شامل ہیں۔
فہرست میں۲۸خواتین‘۵۰سال سے کم عمر کے۴۷نوجوان، درج فہرست ذات سے۲۷؍اور درج فہرست قبائل سے۱۸؍اور دیگر پسماندہ طبقات کے۵۷ امیدوار شامل ہیں۔
تاوڑے نے بتایا کہ ریاست وار فہرست میں اتر پردیش سے۵۱‘ مغربی بنگال سے۲۶‘ مدھیہ پردیش سے۲۴‘ گجرات سے۱۵‘راجستھان سے۱۵‘کیرالہ سے ۱۲‘تلنگانہ سے۹‘ آسام سے۱۱‘ جھارکھنڈ سے۱۱‘چھتیس گڑھ سے بھی۱۱‘دہلی کی پانچ، جموں و کشمیر میں دو، اتراکھنڈ میں تین، گوا، انڈمان نکوبار اور دمن دیو میں ایک ایک سیٹ کے لیے امیدواروں کا اعلان کیا گیا ہے ۔
مرکزی وزیر مملکت میناکشی لیکھی، سابق مرکزی وزراء ڈاکٹر ہرش وردھن اور جینت سنہا، سادھوی پرگیہ بھارتی کے ٹکٹ منسوخ کر دیے گئے ہیں۔
آنجہانی سابق مرکزی وزیر سشما سوراج کی بیٹی بانسوری سوراج کو میدان میں اتارا گیا ہے ۔ مرکزی وزیر جیوترادتیہ سندھیا کو ان کی روایتی سیٹ گنا شیو پوری سے ٹکٹ دیا گیا ہے جبکہ مرکزی وزیر بھوپیندر یادو کو الور سے امیدوار بنایا گیا ہے ۔
