جمالٹہ میں آتشزدگی : ۶رہائشی مکانوں کو نقصان‘شہری ہلاک

سرینگر//
پائین شہر کے جمالٹہ علاقے میں آگ کی ایک واردات میں چھ رہائشی مکانوں کو نقصان پہنچا ہے جبکہ فائر اینڈ ایمرجنسی عملے کی بروقت کارروائی کے نتیجے میں رہائشی مکان میں پھنسے تین افراد کو بچایا گیا تاہم مالک مکان دم گھٹنے سے جاں بحق ہوا۔
فائر اینڈ ایمرجنسی کے ڈپٹی ڈائریکٹر‘عاقب احمد نے بتایا کہ جمالٹہ میں آتشزدگی کی واردات میں تین رہائشی مکان خاکستر ہوئے ہیں۔
عاقب احمد نے نامہ نگاروں سے بات چیت کے دوران بتایا کہ جمالٹہ سری نگر میں جمعرات کی شام چھ بجے رہائشی مکان سے آگ نمودار ہونے کی اطلاع ملتے ہی فائر ٹینڈر جائے موقع پر پہنچے۔
احمد نے بتایا کہ جوں ہی ہم جائے وقوع پر پہنچیں تو ہمیں پتہ چلا کہ جس رہائشی مکان سے آگ نمودار ہوئی وہاں پر تین افراد آگ کی لپٹوں میں پھنس کر رہ گئے ہیں۔انہوں نے کہاکہ فائر اینڈ ایمرجنسی کے اہلکاروں نے اپنی جانوں کو خطرے میں ڈال کر تینوں کو آگ کی لپٹوں سے باہر نکال کر ہسپتال پہنچایا تاہم مالک مکان جس کی شناخت بشیر احمد کے بطور ہوئی ہے کی دم گھٹنے سے موت واقع ہوئی ہے۔
ڈپٹی ڈائریکٹر نے عوام الناس سے اپیل کی ہے کہ وہ گلی کوچوں اور شاہراوں پر گاڑی پارک کرنے سے گریز کریں۔انہوں نے بتایا کہ جوں ہی ہم جمالٹہ پہنچے تو یہاں پر شاہراوں پر گاڑیاں پارک کی گئی تھیں جس وجہ سے فائر عملے کو اندر تک جانے میں مشکلات کا سامنا کرناپڑا۔