سرینگر//
جموںکشمیر کی گرمائی راجدھانی سری نگر کے حول علاقے میں آگ کی ایک واردات میں تین رہائشی مکان خاکستر ہوئے ہیں۔
آگ بجھانے کی کارروائی کے دوران فائر مین زخمی ہوا جس کو علاج ومعالجہ کی خاطر نزدیکی ہسپتال منتقل کیا گیا۔
اطلاعات کے مطابق پائین شہر کے حول علاقے میں بدھ کی شام کو رہائشی مکان سے آگ نمودار ہوئی جس نے آناً فاناً اپنے متصل مزید دو مکانوں کولپیٹ میں لے لیا۔
فائر اینڈ ایمرجنسی اور مقامی لوگوں کی انتھک کوشش کے بعد آگ پر قابو پایا گیا تاہم آتشزدگی کی اس واردات میں تین رہائشی مکان خاکستر ہوئے ہیں۔
معلوم ہوا ہے کہ آگ کی اس واردات میں لاکھوں روپیہ مالیت کی گھریلو اشیائراکھ کے ڈھیر میں تبدیل ہوئی۔
فائر اینڈ ایمرجنسی محکمہ کے ایک سینئر عہدیدار نے یو این آئی اردو کو بتایا کہ بدھ کی شام چھ بجکر۱۵منٹ پر حول سری نگر میں رہائشی مکان سے آگ نمودار ہونے کی اطلاع ملتے ہی فائر اینڈ ایمرجنسی کے اہلکار جائے موقع پر پہنچے ۔
عہدیدار نے کہاکہ علاقہ چونکہ گنجان ہے لہذا فائر اینڈ ایمرجنسی کے ڈپٹی ڈائریکٹرعاقب احمد کی قیادت میں دس فائر ٹینڈر جائے موقع پر پہنچے اور آگ بجھانے کی کارروائی شروع کی ۔
ان کے مطابق آتشزدگی کی اس واردات میں تین رہائشی مکان خاکستر ہوئے ہیں ۔
عہدیدار نے بتایا کہ آگ بجھانے کی کارروائی کے دوران مشتاق احمد نامی فائر مین زخمی ہوا جس سے علاج ومعالجہ کی خاطر نزدیکی ہسپتال منتقل کیا گیا ۔
دریں اثنا پولیس نے آگ لگنے کی وجوہات جاننے کی خاطر کیس درج کرکے مزید تحقیقات شروع کی ہے ۔
ادھروادی کے سیاحتی مقام گلمرگ میں بدھ کی صبح ایک ہوٹل میں آگ نمودار ہوئی جس سے ہوٹل کی بالائی منزل کو نقصان پہنچا۔
محکمہ فائر اینڈ ایمرجنسی کے ایک عہدیدار نے بتایا کہ یہ آگ دن کے قریب ساڑھے گیارہ بجے لگ گئی۔
عہدیدار نے کہا کہ اس ہوٹل کا نام ’پائن پیلس پلاٹینم‘ہے اور یہ ایک تین منزلہ ہوٹل ہے جس کی بالائی منزل سے آگ نمودار ہوئی۔
ان کا کہنا ہے کہ فائر ٹنڈرس آگ کو قابو میں کر رہے ہیں تاہم آگ لگنے کی وجہ ابھی معلوم نہیں ہوسکی ہے ۔