افغان لڑکیوں کو کالجز میں داخلے کی اجازت ملنے پر اقوام متحدہ کا خیر مقدم

کابل//
افغان طالبان کی جانب سے لڑکیوں کو میڈیکل کالجوں میں داخلے کی اجازت دینے کے فیصلے کو افغانستان کے لیے اقوام متحدہ کے مشن (یو ایم اے ایم اے) نے سراہا ہے۔
غیر ملکی ذرائع ابلاغ کے مطابق میڈیکل کالجوں کے اگلے تعلیمی سال میں طالبان انتظامیہ نے لڑکیوں کو داخلے حاصل کرنے کی اجازت دے دی ہے، جس کا آغاز مارچ میں ہوگا۔
اقوام متحدہ کے مشن کا سماجی رابطے کی ویب سائٹ ایکس پر کہنا تھا کہ یو ایم اے کی جانب سے افغان عبوری حکومت کے اس فیصلے کا خیرمقدم کرتے ہیں، جس کے تحت ملک کے 11 صوبوں میں لڑکیاں میڈیکل کالجوں میں داخلہ حاصل کرسکیں گی۔
اقوام متحدہ کے جاری کردہ بیان میں کہا گیا ہے کہ خواتین اور لڑکیوں کے لئے ثانوی اور اعلیٰ تعلیم تک رسائی ضروری ہے، یہ فیصلہ جنگ زدہ ملک میں طبی سہولیات میں پائے جانے والا خلا کم کرنے کی جانب اہم قدم ہے۔
رپورٹ میں کہا گیا ہے کہ افغانستان کی وزارت اطلاعات کے ترجمان کا کہنا ہے کہ وزارت صحت کے احکامات کے بعد افغانستان کے 11 صوبوں میں انرولمنٹ کا عمل شروع کردیا گیا ہے۔
ترجمان کے مطابق اس فیصلے کے بعد بارھویں تک تعلیم حاصل کرنے والی لڑکیاں ملک کے صوبوں کپیسا، پکتیا، پاروان، پنجشیر، پکتیکا، بامیان، بدخشاں، غزنی، میدان واردک، خوست اور لوغار میں میڈیکل کالجوں میں داخلہ لے سکتی ہیں۔
واضح رہے کہ افغانستان میں قائم طالبان کی عبوری حکومت کو اگست 2021 میں اقتدار پر قبضہ کرنے کے بعد لڑکیوں کی تعلیم پر پابندی عائد کرنے پر دنیا بھر سے تنقید کا سامنا تھا۔