سعودی حکومت نے عازمین حج کیلئے اسمارٹ فون لازمی قرار دیدیا

سرینگر//
سعودی حکومت نے رواں برس تمام عازمین حج کیلئے ا سمارٹ فون ہمراہ لے جانا لازمی قرار دے دیا۔
اس حوالے سے جاری اعلامیے کے مطابق مسجد نبویؐ اور ریاض الجنہ میں نوافل ادا کرنے کیلئے موبائل ایپلی کیشن سے وقت لینا ضروری ہے ۔ عازمین حج کیلئے عمرہ اور طواف کعبہ کیلئے جانے سے پہلے وقت لینا ضروری ہوگا۔
اعلامیے میں کہا گیا ہے کہ اس مقصد کیلئے موبائل ایپلی کیشن کے ذریعے وقت لیا جائے گا جو اسمارٹ فون کے ذریعے ہی ممکن ہے۔
علاوہ ازیں ریاض الجنہ میں نوافل ادا کرنے کیلئے بھی موبائل ایپلی کیشن کے ذریعے پیشگی وقت حاصل کرنا ضروری ہے۔
عازمین حج کیلئے توکلنا اور اعتمرنا کے نام سے ۲موبائل ایپلی کیشن بنائی گئی ہیں جو گوگل پلیا سٹور سے ڈاؤن لوڈ کی جا سکیں گی۔
موبائل ایپلی کیشن انسٹال کرنے کیلئے عازمین کے شناختی کارڈ، پاسپورٹ اور ویزا کے نمبر درکار ہیں۔
اعلامیے میں مزید کہا گیا ہے کہ تمام عازمین حج اپنا ای میل ایڈریس بنا کر پاس ورڈ اپنے پاس محفوظ کر لیں اور روانگی سے پہلے موبائل ایپس استعمال کرنا سیکھ لیں۔