متھرا میں شاہی عیدگاہ کمپلیکس کے سروے کے حکم پر سپریم کورٹ کا حکم امتناع

نئی دہلی// سپریم کورٹ نے منگل کے روز الہ آباد ہائی کورٹ کے 14 دسمبر 2023 کے حکم پر روک لگا دی جس میں متھرا میں شاہی عیدگاہ مسجد کے سروے کی ہدایت دی گئی تھی۔
جسٹس سنجیو کھنہ اور جسٹس دیپانکر دتہ کی بنچ نے متعلقہ فریقوں کے دلائل سننے کے بعد ہائی کورٹ کے حکم پر روک لگانے کا حکم دیا۔ تاہم بنچ نے واضح کیا کہ کیس کی مزید کارروائی ہائی کورٹ کے سامنے جاری رہے گی۔
ہائی کورٹ نے ایڈوکیٹ کمشنر کورٹ (کورٹ کمشنر) کی زیر قیادت ٹیم کی نگرانی میں 14 دسمبر 2023 کو اتر پردیش کے متھرا میں کرشنا جنم بھومی مندر سے متصل شاہی عیدگاہ کمپلیکس کے ابتدائی سروے کی اجازت دی تھی۔
اس حکم کو چیلنج کرنے والی درخواستوں پر، سپریم کورٹ نے مسجد فریق کی طرف سے پیش ہونے والے وکیل کی سماعت کے بعد کہا، "سروے کمیشن کی تقرری کے حکم پر عمل درآمد نہیں کیا جائے گا۔”
الہ آباد ہائی کورٹ نے شاہی عیدگاہ مسجد کا معائنہ کرنے کے لیے کمیشن قائم کرنے کی ہدایت دی ہے ۔
ہندو فریق کی جانب سے ایڈوکیٹ شیام دیوان نے سپریم کورٹ کے سامنے ہائی کورٹ کے حکم پر روک لگانے کی درخواست کی مخالفت کی۔
تاہم سپریم کورٹ نے اس حکم پر روک لگا دی۔ ساتھ ہی نوٹس جاری کرتے ہوئے کہا کہ متعلقہ بنچ اس معاملے کی اگلی سماعت 23 جنوری 2024 کو کرے گی۔
الہ آباد ہائی کورٹ کے جسٹس میانک کمار جین کی سنگل بنچ نے اپنے حکم میں کہا تھا کہ وہ کمشنر کی تقرری اور سروے کے طریقہ کار پر فیصلہ کرے گی۔
ہائی کورٹ نے یہ حکم ہری شنکر جین اور دیگر کے ذریعے دائر درخواست پر دیا تھا۔ درخواست گزاروں نے دلیل دی کہ یہ مسجد مغل بادشاہ اورنگزیب کی جانب سے بھگوان کرشن کی جائے پیدائش کے ایک حصے کو منہدم کرنے کے بعد بنائی گئی تھی۔
ہندو فریق نے پوری 13.37 ایکڑ اراضی کی ملکیت کا دعویٰ کیا ہے جس پر تعمیرات واقع ہیں۔ انہوں نے شاہی عیدگاہ مسجد کمیٹی اور کرشنا جنم بھومی ٹرسٹ کے درمیان 1968 کے معاہدے کو بھی چیلنج کیا تھا، جس نے مسجد کو اس زمین کو استعمال کرنے کی اجازت دی تھی۔