سرینگر//
اسلامک یونیورسٹی آف سائنس اینڈ ٹیکنالوجی (آئی یو ایس ٹی) اونتی پورہ نے بدھ کے روز زائد از ایک ماہ کی سرمائی تعطیلات کا اعلان کر دیا۔
یونیورسٹی میں یہ سرمائی تعطیلات یکم جنوری سے شروع ہو کر۱۱فروری کو اختتام پذیر ہوں گی تاہم اس دوران امتحانات کو حسب شیڈول منعقد کیا جائے گا اور دیگر انتظامی سرگرمیاں بھی بغیر کسی رکاوٹ کے انجام دی جائیں گی۔
یونیورسٹی کی طرف سے جاری ایک نوٹیفکیشن میں کہا گیا’’یونیورسٹی میں یکم جنوری سے۱۱فروری تک سرمائی تعطیلات ہوں گی تاہم پہلے سے طے شدہ یا طے ہونے والے امتحانات حسب شیڈول منعقد ہوں گے نیز انتظامی سرگرمیوں کی انجام دہی میں بھی کوئی رکاوٹ نہیں آئے گی۔‘‘
یاد رہے کہ گزشتہ روز کشمیریونیورسٹی نے بھی یکم جنوری سے ۲۵فروری۲۰۲۴تک یونیورسٹی کے مرکزی کیمپس واقع درگارہ حضرت بل سمیت دیگر اضلاع کے سیٹلائٹ کیمپس میں سرمائی تعطیلات کا اعلان کیا ۔
اس کے علاوہ یونیورسٹی نے اپنے منسلک سبھی پرائیوٹ کالجوں کی سرمائی تعطیلات کیلئے۲۷دسمبر ۲۰۲۳سے ۱۴فروری ۲۰۲۴تک بند رکھنے کا اعلان بھی کیا ہے۔اس ضمن میں یونیورسٹی کی جانب باضابطہ طور ایک نوٹیفیکشن جاری کی گئی ہے،جس میں یونیورسٹی کے سبھی شعبہ جات میں زیر تعلیم طلبہ وطالبات اور تدریسی عملے کو مطلع کیا گیا ہے کہ یکم جنوری سے سرمائی چھٹیوں کا اطلاق عمل میں ہوگا۔
