راجوری اور پونچھ اضلاع میں اضافی بٹالین کی تعیناتی پر غوروغوض

جموں//
جموںکشمیر کے راجوری اور پونچھ اضلاع میں ملی ٹینٹ سرگرمیوں میں غیر معمولی اضافہ کے بیچ ملک دشمن عناصر کے منصوبوں کو ناکام بنانے کی خاطر اضافی فوجی بٹالین کو تعینات کرنے کا امکان ہے ۔
ذرائع کا کہنا ہے کہ پونچھ اور راجوری اضلاع میں سرگرم ملی ٹینٹوں کو کیفر کردار تک پہنچانے کی خاطر سیکورٹی ایجنسیوں نے بڑے پیمانے پر آپریشن شروع کیا ہے ۔
اطلاعات کے مطابق پونچھ اور راجوری میں امسال دہشت گردانہ سرگرمیوں میں غیر معمولی اضافہ دیکھنے کو ملا ہے جس کے پیش نظر دونوں اضلاع میں اضافی فوجیوں کی تعیناتی پر غو ر و غوض ہو رہا ہے ۔
ذرائع نے بتایا کہ پیر کے روز فوجی سربراہ منوج پانڈے نے پونچھ کا دورہ کیا اوروہاں پر سولہ کارپس کمانڈر ، شمال مشرقی کمان کے کمانڈر کے علاوہ دیگر سینئر آفیسران کے ساتھ پونچھ اور راجوری میں ملی ٹینسی کے بڑھتے ہوئے واقعات کو روکنے کی خاطر نئی حکمت عملی ترتیب دینے پر گفت وشنید کی ۔
ذرائع کے مطابق پونچھ او رراجوری میں سرگرم ملی ٹینٹوں اور ان کے مدد گاروں کے خلاف بڑے پیمانے پر آپریشن شروع کرنے کا فیصلہ لیا گیا ہے ۔
ذرائع کا کہنا ہے کہ دونوں اضلاع میں اضافی فوجیوں کی تعیناتی پر بھی تبادلہ خیال ہوا۔
معلوم ہوا ہے کہ فوجی سربراہ نے پونچھ میں ایک اعلیٰ سطحی میٹنگ کی بھی صدارت کی جس دوران انہیں سرحدی اضلاع میں دہشت گردوں کے خلاف چلائے جارہے آپریشنز کے بارے میں جانکاری فراہم کی گئی۔
ذرائع کے مطابق دونوں اضلاع میں ملک دشمن عناصر کے منصوبوں کو ناکام بنانے کی خاطر اضافی فوجی دستوں کی تعیناتی پر غور وغوض ہور ہا ہے ۔
راجوری اور پونچھ اضلاع میں اضافی فوجی کمپنیوں کی تعیناتی کا ابھی تک کوئی حتمی فیصلہ نہیں لیا گیا تاہم اس حوالے سے سنجیدگی کے ساتھ غور وغوض ہو رہا ہے ۔
ذرائع کا کہنا ہے کہ بدھ کے روز وزیر دفاع راج ناتھ سنگھ بھی پونچھ کے دورے پر آرہے ہیں جس دوران انہیں بھی سرحدی اضلاع کی سیکورٹی صورتحال کے بارے میں بریفنگ دی جائے گی۔