میلبور// آسٹریلیا نے پاکستان کے خلاف 26 دسمبر کو ہونے والے دوسرے ٹیسٹ میچ کے لیے 13 کھلاڑیوں پر مشتمل اپنی ٹیم کا اعلان کر دیا ہے۔
سلیکٹرز نے پہلے ٹیسٹ میچ کے بعد لانس مورس کو ٹیم سے باہر کیا ہے۔ وہ بی بی ایل میں پرتھ سکارچرز کے لیے کھیل سکتے ہیں۔ پہلے میچ کے لیے 14 رکنی ٹیم کا انتخاب کیا گیا۔ اس بار بھی ٹیم میں اسٹیو اسمتھ اور ٹریوس ہیڈ کو نائب کپتان بنایا گیا ہے اور پیٹ کمنز ٹیم کی قیادت کریں گے۔
آئی سی سی کی رپورٹ کے مطابق مشل اسٹارک، جوش ہیزل ووڈ اور کپتان پیٹ کمنز تینوں کو میلبورن میں نئی گیند کی ذمہ داری تقسیم کرسکتی ہے۔ آل راؤنڈر کیمرون گرین ٹیم میں اپنی جگہ برقرار رکھنے کی دوڑ میں بدستور موجود ہیں لیکن کمنز کا خیال ہے کہ پرتھ میں اتنی متاثر کن کارکردگی دکھانے والی ٹیم میں کوئی تبدیلی کرنا مشکل ہو گا۔
آسٹریلیا نے ٹیسٹ سیریز کا پہلا میچ 360 رنز کے بڑے مارجن سے جیتا تھا۔
کمنز نے باکسنگ ڈے ٹیسٹ میں کھیلنے والی الیون کے بارے میں کہا ’’مجھے نہیں لگتا کہ چوٹیں کوئی مسئلہ بننے والی ہیں، اس لیے میں یہ کہنے کی ہمت کروں گا کہ یہ اس مرحلے پر بالکل اسی طرح کی لائن اپ ہوگی۔‘‘
انہوں نے کہا “میرے خیال میں (پرتھ میں جیت) کے بعد سبھی گیند باز ترو تازہ ہیں۔ یہ بنیادی طور پر موسم گرما کا بہترین آغاز ہے۔‘‘
آسٹریلیا کی ٹیم اس طرح ہے:- پیٹ کمنز (کپتان)، اسکاٹ بولینڈ، ایلکس کیری، کیمرون گرین، جوش ہیزل ووڈ، ٹریوس ہیڈ، عثمان خواجہ، مارنس لیبوشین، نیتھن لیون، مچ مارش، اسٹیو اسمتھ، مچ اسٹارک، ڈیوڈ وارنر۔
ادھر انٹرنیشنل کرکٹ کونسل (آئی سی سی) نے پرتھ میں کھیلے گئے پہلے ٹیسٹ میں آسٹریلیا کے خلاف سلو اوور ریٹ کے لیے پاکستان پر اس کی میچ فیس کا 10 فیصد جرمانہ عائد کیا ہے اور ساتھ ہی ورلڈ ٹیسٹ چیمپئن شپ میں اس کے دو پوائنٹس کی کٹوتی کردی ہے۔
آئی سی سی کی ایک ریلیز کے مطابق، ایمریٹس آئی سی سی ایلیٹ پینل آف میچ ریفری جواگل سری ناتھ نے پاکستان کو ہدف سے دو اوورز کم پائے جانے پر جرمانہ عائد کیا۔
آئی سی سی ضابطہ اخلاق کے آرٹیکل 2.22 کے مطابق کم از کم اوور ریٹ کے لیے ٹیم کی جانب سے مقررہ وقت میں گیند نہ کرنے میں ناکام رہنے پرہر اوور کے لئے ان کی میچ فیس کا پانچ فیصد جرمانہ عائد کیا جاتا ہے۔
اس کے علاوہ آئی سی سی ورلڈ ٹیسٹ چیمپئن شپ کھیلنے کی صورت میں ، آرٹیکل 16.11.2 کے مطابق ہر اوور کے لیے ایک پوائنٹ کا جرمانہ کیا جاتا ہے۔ اس کے نتیجے میں، پاکستان کے کل پوائنٹس میں سے دو ورلڈ ٹیسٹ چیمپئن شپ پوائنٹس کاٹ لئے گئے ہیں۔
پاکستان کے کپتان شان مسعود نے غلطی تسلیم کرتے ہوئے مجوزہ سزا کو قبول کر لیا۔