ملازمین کو نظر ثانی شدہ نرخوں پر مہنگائی الاؤنس کی ادائیگی کی منظوری

سرینگر//
جموںکشمیر حکومت نے منگل کو اپنے ملازمین کو نظر ثانی شدہ نرخوں پر مہنگائی الاؤنس کی ادائیگی کو منظوری دے دی جس کا اطلاق یکم جولائی۲۰۲۳سے ہوگا۔
ایک سرکاری حکم نامہ میں کہا گیا ہے’’۴مئی ۲۰۲۳ کے سرکاری آرڈر نمبرایف۹۳کو جاری رکھتے ہوئے یہ حکم دیا جاتا ہے کہ ساتویں پے کمیشن کی سفارشات کے تحت ریگولر پے اسکیل میں کام کرنے والے سرکاری ملازمین کو مہنگائی الاؤنس دیا جائے گا۔ ڈی اے کی موجودہ شرح بنیادی تنخواہ کا ۴۲ فیصد سے ۴۶ فیصد ماہانہ ہے جویکم جولائی۲۳سے نافذ العمل ہے‘‘۔
حکم میں مزید کہا گیا ہے کہ ترمیم شدہ تنخواہ کے ڈھانچے میں’بنیادی تنخواہ‘کی اصطلاح کا مطلب ہے کہ ساتویں پے کمیشن کی سفارشات کے مطابق پے میٹرکس میں مقررہ سطح پر لی گئی تنخواہ لیکن اس میں خصوصی تنخواہ وغیرہ جیسی کسی دوسری قسم کی تنخواہ شامل نہیں ہے۔ ۲ جولائی۲۰۲۳سے نومبر ۲۰۲۳تک مہنگائی الاؤنس کی اضافی قسط کی وجہ سے بقایا جات دسمبر ۲۰۲۳میں نقد ادا کیے جائیں گے۔نظر ثانی شدہ مہنگائی الاؤنس دسمبر ۲۰۲۳سے ماہانہ پنشن / فیملی پنشن کا حصہ ہوگا۔ ۵۰ پیسے یا اس سے زیادہ کے حصے پر مشتمل مہنگائی الاؤنس کی ادائیگی اگلے اونچے روپے میں کی جائے گی اور ۵۰ پیسے سے کم کے حصے کو نظر انداز کیا جائے گا۔