مسرور کا قتل انسانیت اور کشمیریت کا قتل : رینہ

سرینگر//
بی جے پی کے جموں کشمیر یونٹ کے صدر‘ رویندر رینہ نے عید گاہ علاقے میں ملی ٹنٹوں کے حملے میں جاں بحق ہونے والے پولیس افسر مسرور وانی کو ایک دیانتدار افسر قرار دیتے ہوئے کہا کہ وہ خدمت خلق کے جذبے سے سرشار افسر تھے ۔انہوں نے کہا کہ ان کا قتل انسانیت اور کشمیریت کا قتل ہے ۔
رینہ نے ان باتوں کا اظہار ہفتے کو یہاں رعناروای ‘جہاں انہوں نے پولیس افسر کے اہل خانہ کے ساتھ ملاقات کی اور ان کے ساتھ تعزیت و تسلیت کی‘میں میڈیا کے ساتھ بات کرنے کے دوران کیا ۔
بی جے پی یونٹ صدر نے کہا’’مسرور احمد وانی خدمت خلق کے جذبے سے سر شار تھے اور وہ غریبوں کی مدد کے لئے ہمیشہ پیش پیش رہتے تھے‘‘۔
رینہ کا کہنا تھا’’ان کا قتل انسانیت اور کشمیریت کا قتل ہے جو انتہائی تکلیف دہ واقعہ ہے اور سر زمین کشمیر ایک بار پھر بے گناہ کے کون سے لہو لہان ہوئی ہے‘‘۔
بی جے پی لیڈر نے کہا کہ جن لوگوں نے یہ کام انجام دیا وہ یہاں کے امن اور خوشحالی کے دشمن ہیں ۔انہوں نے کہا’’آخر کب تک یہاں بے گناہوں کا خون بہتا رہے گا ایسے واقعات کو بر داشت نہیں کیا جا سکتا ہے‘‘۔ان کا کہنا تھا کہ مسرور احمد کا نام دوستوں کے حلقوں میں مدد کرنے کے لئے مشہور تھا۔
بتادیں ک سری نگر کے عید گاہ علاقے میں سال رواں کے۲۹؍اکتوبر کو جنگجوئوں کے حملے میں زخمی ہونے والا پولیس انسپکٹر ۷دسمبر کی صبح دہلی کے ایک ہسپتال میں زندگی کی جنگ ہار گیا۔