بارہمولہ اور کولگام اضلاع میں ۲ منشیات فروش گرفتار

سرینگر//
منشیات کے خلاف جنگ کو جای رکھتے ہوئے جموں کشمیر پولیس نے بارہمولہ اور کولگام اضلاع میں الگ الگ کارروائیوں کے دوران دو منشیات فروشوں کو گرفتار کرکے ان کی تحویل سے نشہ آور مواد بر آمد کیا ہے ۔
ایک پولیس ترجمان نے اپنے ایک بیان میں کہا کہ باباریشی پولیس پوسٹ کی ایک ٹیم نے باباریشی کراسنگ پر ناکہ کے دوران ایک شخص کو روکا۔
ترجمان نے بتایا کہ کہ تلاشی کے دوران مذکورہ شخص کی تحویل سے۲۸گرام چرس جیسا مواد بر آمد کیا گیا جس کے بعد اس کو گرفتار کرکے پولیس اسٹیشن ٹنگمرگ منتقل کیا گیا۔
بیان میں گرفتار شدہ کی شناخت محمد اظہر خان ولد طارق احمد خان ساکن قاضی پورہ ٹنگمرگ کے بطور کی ہے ۔
پولیس نے اس ضمن میں ایک کیس درج کرکے مزید تحقیقات شروع کی ہے ۔
قابل ذکر ہے کہ منشیات کی وبا کے خلاف جنگ کو جاری رکھتے ہوئے بارہمولہ پولیس نے سال رواں کے پہلے۱۰مہینوں کے دوران۲۴۲مقدمے درج کرکے۴۲۵ منشیات فروشوں کو گرفتار کیا ہے جبکہ منشیات کے کاروبار سے حاصل کی گئی کروڑوں روپے مالیت کی جائیدادوں کو ضبط بھی کیا ہے ۔
اسی نوعیت کی ایک اور کارروائی کے دوران کولگام پولیس نے ایک بدنام زمامہ منیشات فروش کو گرفتار کرکے اس کی تحویل سے نشہ آور ادویات بر آمد کی ہیں۔
کولگام پولیس نے’ایکس‘پر ایک پوسٹ کے ذریعے جانکاری فراہم کرتے ہوئے کہا کہ کولگام پولیس نے ایک بدنام زمانہ منشیات فروش کو گرفتار کرکے اس کی تحویل سے کوڈین فاسفیٹ جیسے ۹ممنوعہ بوتلیں بر آمد کیں۔
پوسٹ میں منشیات فروش کی شناخت سبزار احمد بٹ ساکن تاری گام کے بطور کی گئی۔
پوسٹ میں مزید کہا گیا کہ اس سلسلے میں پولیس اسٹیشن کولگام میں این ڈی پی ایس کے متعلقہ دفعات کے تحت ایک کیس درج کرکے تحقیقات شروع کی گئی۔