بھدرواہ میں آتشزدگی گیسٹ ہاؤس سمیت ۸رہائشی مکان خاکستر

جموں//
جموں وکشمیر کے ضلع ڈوڈہ کے چنوٹ بھدرواہ میں آتشزدگی کی ایک بھیانک واردات میں آٹھ رہائشی مکان خاکستر ہوئے ہیں۔اطلاعات کے مطابق بدرواہ کے چنوٹ گاوں میں بدھ اور جمعرات کی درمیانی شب عمارت سے آگ نمودار ہوئی جس نے آناً فاناً اپنے متصل متعدد ڈھانچوں کو لپیٹ میں لے لیا۔
معلوم ہوا ہے کہ فائر اینڈ ایمرجنسی اور مقامی لوگوں کی بروقت کارروائی کے نتیجے میں گر چہ آگ پر قابو پایا گیا تاہم آتشزدگی کی اس واردات میں گیسٹ ہاوس اور فوڈ پوائنٹ سمیت آٹھ مکانوں کو نقصان پہنچا ہے ۔
فائر اینڈ ایمرجنسی کے ایک عہدیدار نے بتایا کہ چنوٹ بدرواہ میں رہائشی مکان سے آگ نمودار ہونے کی اطلاع ملتے ہی فائر اینڈ ایمرجنسی کے اہلکار جائے موقع پر پہنچے ۔انہوں نے بتایا کہ آگ اس قدر بھیانک تھی کہ چند منٹوں کے اندر اندر ہی متعدد ڈھانچے اس کی لپیٹ میں آئے ۔ان کے مطابق فائر اینڈ ایمرجنسی عملے کی بروقت کارروائی کے نتیجے میں آگ کو مزید پھیلنے سے روک دیا گیا۔
دریں اثنا پولیس نے آگ لگنے کی وجوہات جاننے کی خاطر کیس درج کرکے تحقیقات شروع کی ہے ۔