وادی میں۱۰نومبر کی صبح تک موسم خراب رہنے کا امکان

سرینگر//
محکمہ موسمیات نے وادی کشمیر میں اگلے چوبیس گھنٹوں کے دوران برف وباراں کی پیش گوئی کرتے ہوئے کسانوں سے۹نومبر کو کھیتی باڑی سے متعلق آپریشنز کو معطل کرنے کا مشورہ دیا ہے ۔
متعلقہ محکمے کے ایک ترجمان نے بتایا کہ وادی میں۷نومبر کو موسم مجموعی طور پر خشک رہنے کا امکان ہے ۔
ترجمان نے کہا کہ بعد ازاں وادی میں۸نومبر کو مطلع ابر آلود رہ سکتا ہے اور اس دوران پہاڑی علاقوں میں کہیں کہیں ہلکی برف باری جبکہ میدانی علاقوں میں بارشوں کا امکان ہے ۔
ان کا کہنا تھا کہ وادی میں۹نومبر کو بھی مطلع ابر آلو دہ ر سکتا ہے اور اس دوران میدانی علاقوں میں ہلکی بارشیں جبکہ پہاڑی علاقوں (راز دان پاس، سنتھن پاس، سادھنا پاس، زوجیلا، مغل روڈ) پر برف باری ہوسکتی ہے ۔
ترجمان نے بتایا کہ وادی میں۱۰نومبر کو مطلع ابر آلود ہی رہ سکتا ہے اور صبح کے وقت کہیں کہیں بارشیں بھی ہوسکتی ہیں تاہم بعد ازاں موسم میں بتدریج بہتری واقع ہوگی۔انہوں نے کہا کہ اس کے بعد وادی میں۱۱سے۱۵نومبر تک موسم خشک رہنے کا ہی امکان ہے ۔
محکمے نے ایڈوائزری جاری کرتے ہوئے کسانوں سے کہا کہ وہ۹نومبر کو کھیتی باڑی سے متعلق تمام آپریشنز معطل رکھیں۔انہوں نے کہا کہ برف باری سے پہاڑی علاقوں میں سڑکوں پر پھسلن کی وجہ سے ٹرانسپورٹ کی نقل و حمل متاثر ہوسکتی ہے ۔
ان کا کہنا تھا کہ اس دوران وادی میں درجہ حرارت میں بھی کمی درج ہونے کی توقع ہے ۔