کوہلی کو ڈریسنگ روم میں ’ بیسٹ فیلڈرآف دی میچ‘ کا ایوارڈ دیا گیا

نئی دہلی// ہندوستان بمقابلہ آسٹریلیا میچ میں بہترین فیلڈنگ کرنے والے ویراٹ کوہلی کو ہندوستان کے ڈریسنگ روم میں ’بیسٹ فیلڈرآف دی میچ کے ایوارڈ سے نوازا گیا۔
اتوار کو کھیلے گئے اس میچ میں کوہلی نے نہ صرف بیٹنگ کی بلکہ بہترین فیلڈنگ بھی کی اور آسٹریلوی بلے باز مچل مارش کا ایک شاندار کیچ لیا جس کا پورے میچ میں سب سے زیادہ چرچا رہا۔ اس شاندار کیچ پر کوہلی کو ڈریسنگ روم میں اعزاز سے نوازا گیا۔
بی سی سی آئی نے اس سے متعلق ایک ویڈیو جاری کیا ہے، جس میں ویراٹ کوہلی کو ڈریسنگ روم میں ’بیسٹ فیلڈر آف دی میچ‘ کے ایوارڈ سے نوازتے ہوئے دکھایا گیا ہے۔ ہندوستانی ٹیم کے فیلڈنگ کوچ ٹی دلیپ نے ویراٹ کوہلی کو گولڈ میڈل سے نوازا۔ اس کے بعد ویراٹ نے تقریب کو رافیل نڈال کے انداز میں منایا۔ اس دوران ڈریسنگ روم میں موجود ٹیم کے تمام کھلاڑیوں نے ویراٹ کے لیے تالیاں بجائیں۔
اس سے قبل راہل ڈراوڑ نے کہا کہ آج سے ڈریسنگ روم میں ایک چھوٹی سی تبدیلی ہو رہی ہے۔ فیلڈنگ میڈل آج دیا جائے گا۔ اس کے بعد فیلڈنگ کوچ ٹی دلیپ نے کہا کہ یہ تمغہ صرف اس کھلاڑی کو نہیں دیا جائے گا جو اپنا کام کرے گا بلکہ اسے دیا جائے گا جو دوسرے کھلاڑیوں کی حوصلہ افزائی کرے گا۔ اس دوران ٹی دلیپ نے کل کھیلے گئے میچ میں پیٹ کمنز اور ایڈم زمپا کے آئر کے دو شاندار کیچز کا بھی ذکر کیا۔
قابل ذکر ہے کہ ویراٹ کوہلی نے کل کے میچ میں بیٹنگ کرتے ہوئے 85 رنز کی شاندار اننگز کھیلی۔ کوہلی نے کے ایل راہل (97) کے ساتھ 165 رنز کی شراکت داری کی تھی جس کی وجہ سے ہندوستان نے یہ میچ چھ وکٹوں سے جیت لیا۔