ڈوڈہ میں اراضی تنازعہ پر مبینہ طور بھائی کے ہاتھوں بھائی کا قتل

جموں//
جموںکشمیر کے ضلع ڈوڈہ کے بھلیسہ علاقے میں اراضی تنازعہ کو لے کر دو بھائیوں کے درمیان ہوئی ہاتھا پائی کے نتیجے میں مبینہ طور پر چھوٹے بھائی نے اپنے بڑے بھائی جو پیشہ سے ایک استاد تھا، کو قتل کر دیا۔
ذرائع نے بتایا کہ ڈوڈہ کے بھلیسہ کے سنوارہ گائوں میں اراضی تنازعہ کو لے کر دو بھائیوں کے درمیان ہاتھا پائی ہوئی جس دوران امتیاز احمد ولد نذیر احمد نامی چھوٹے بھائی نے اپنے بڑے بھائی اشتیاق احمد کو شدید زخمی کر دیا۔
ذرائع نے کہا کہ اشتیاق احمد کو فوری طور علاج و معالجے کیلئے سب ضلع ہسپتال گنڈوہ پہنچایا گیا جہاں سے اس کو جی ایم سی ڈوڈہ ریفر کیا گیا جہاں وہ زخموں کی تاب نہ لا کر دم توڑ گیا۔
معلوم ہوا ہے کہ اشتیاق احمد پیشے سے استاد تھے جبکہ امتیاز احمد پولیس میں ایس پی او کے بطور تعینات تھا۔
دریں اثنا پولیس نے اس ضمن میں ایک کیس درج کرکے تحقیقات شروع کی ہیں اور دو افراد کو گرفتار کیا ہے ۔