جھیل ڈل سے غرقاب ہوئے نوجوان کی لاش ملی

سرینگر//
جموںکشمیر کی گرمائی راجدھانی سرینگر کے شہر ہ آفاق جھیل ڈل میں جمعرات دیر شام غرقاب ہوئے نوجوان کی لاش باز یاب کی گئی ہے ۔
اطلاعات کے مطابق جمعرات کی شام کو جھیل ڈل میں گھاٹ نمبر ایک کے نزدیک نامعلوم شخص پیر پھسل جانے کی وجہ سے پانی میں ڈوب گیا۔
ذرائع نے بتایا کہ اطلاع ملتے ہی پولیس، ایس ڈی آر ایف اور ریور پولیس کی ٹیمیں فوری طورپر جائے موقع پر پہنچے اور ریسکیو آپریشن شروع کیا۔
معلوم ہوا ہے کہ رات بھر ریسکیو آپریشن جاری رہا اور جمعے کی صبح غرقاب ہوئے نوجوان کی لاش باز یاب کی گئی۔متوفی کی شناخت امتیاز احمد ساکن صورہ کے بطور ہوئی ہے ۔
ذرائع کا کہنا ہے کہ نوجوان نے مبینہ طورپر جھیل ڈل میں چھلانگ لگا کر اپنی زندگی کا خاتمہ کیا تاہم آزاد ذرائع سے اس کی تصدیق نہیں ہو سکی۔
دریں اثنا پولیس نے اس سلسلے میں کیس درج کرکے مزید تحقیقات شروع کی۔
اس دوران شمالی کشمیر کے ضلع بارہمولہ کے سوپور قصبے میں جمعہ کی صبح دریائے جہلم سے ایک عدم شناخت لاش بر آمد کی گئی۔
ذرائع نے بتایا کہ سوپور میں دریائے جہلم سے جمعہ کی صبح ایک عدم شناخت لاش بر آمد کی گئی۔انہوں نے کہا کہ مقامی لوگوں نے اس لاش کو پانی میں تیرتے ہوئے دیکھا جس نے بعد انہوں نے پولیس کو مطلع کیا۔
دریں اثنا پولیس نے طبی و قانونی لوازمات کی ادائیگی کے لئے لاش کو اپنی تحویل میں لے کر اس سلسلے میں تحقیقات شروع کی ہے ۔
ذرائع نے بتایا کہ لاش کی شناخت معلوم کی جا رہی ہے ۔