سرینگر/۹اگست
لیفٹیننٹ گورنر ‘منوج سنہا نے ترنگا یاترا کے جشن کی تیاریوں کا جائزہ لینے کے لیے سول انتظامیہ، پولیس اور سیکورٹی فورسز کے سینئر افسران کے ساتھ ایک اعلیٰ سطحی میٹنگ کی صدارت کی۔
میٹنگ میں چیف سکریٹری ڈاکٹر ارون کمار مہتا ‘ ایس آر کے گوئل، ایڈیشنل چیف سکریٹری، محکمہ داخلہ‘ لیفٹیننٹ جنرل راجیو گھئی، جی او سی 15 کور‘ڈاکٹر مندیپ کمار بھنڈاری، لیفٹیننٹ گورنر کے پرنسپل سکریٹری‘ ایس ایچ ایم کے سنہا، اے ڈی جی پی ہیڈکوارٹر وجے کمار، اے ڈی جی پی کشمیر‘وجے کمار بدھوری، ڈویڑنل کمشنر کشمیر اور سیکورٹی فورسز، پولیس اور یو ٹی انتظامیہ کے دیگر سینئر افسران نے شرکت کی۔
لیفٹیننٹ گورنر نے کہا کہ ہم سب کو اپنے پیارے ترنگے کو سلامی دینے اور اس موقع پر جشن منانے میں خصوصی فخر محسوس کرنا چاہئے۔ انہوں نے مزید کہا کہ یہ ہمارے آزادی پسندوں کی عظیم قربانی کو یاد کرنے کا بھی موقع ہے، جنہوں نے ہمیں ہماری آزادی دلائی۔
سنہا نے مزید کہا کہ تمام شعبہ ہائے زندگی سے تعلق رکھنے والے شہریوں کو 13 اگست کو کے آئی سی سی سے بوٹینیکل گارڈن تک واک کاتھون میں شرکت کے لیے اکٹھا ہونا چاہیے تاکہ آزادی کے مجاہدین اور تمام بہادر سپاہیوں کو خراج عقیدت پیش کیا جا سکے، جنہوں نے اتحاد ‘قوم کی سالمیت کے لیے اپنی جانیں قربان کیں۔
لیفٹیننٹ گورنر نے ’میرا مٹی میرا دیش‘ اور ’ہر گھر ترنگا‘ تہوار منانے کی تیاریوں پر بھی تبادلہ خیال کیا۔
