امسال اب تک ۱۵ہزار غیر ملکی سیاح کشمیر آئے

سرینگر//
گزشتہ برسوں کے دوران جہاں مقامی اور ملکی سیاحوں کا وادی کشمیر کی سیر پر آنے کا رجحان بڑھ رہا ہے وہیں اب غیر ملکی سیاح بھی کشمیر کا رخ کر رہے ہیں۔
رواں برس کے ابتدائی سات ماہ کے دوران ۱۵ہزار سے زائد سیاحوں نے یہاں کا رخ کیا ہے۔
امسال کے ابتدائی۷ماہ میں وادی کشمیر میں آنے والے غیر ملکی سیاحوں کی تعداد ۱۵ہزار سے تجاوز کر چکی ہے۔ گزشتہ برس یہ تعداد لگ بھگ ۴ہزار تھی۔ حکومت کو امید ہے کہ وادی کشمیر کا دورہ کرنے والے غیر ملکی سیاحوں کے تمام سابق ریکارڈ ٹوٹ جائیں گے۔ اس طرح سے گزشتہ تین برسوں میں شعبہ سیاحت کو کافی بڑھاوا ملا ہے۔ اس کے بدولت قریب ۱۲لاکھ افراد کو روزگار بھی حاصل ہو پایا ہے۔
محکمہ سیاحت کے سیکریٹری ‘سید عابد رشید شاہ نے کہا ہے ’’گزشتہ برسوں سے سیاحوں کی ریکارڈ تعداد دیکھنے کو ملی رہی ہے اور آئے روز اس میں اضافہ ہو رہا ہے جو کہ ایک خوش آئند رجحان ہے۔‘‘
شاہ نے مزید کہا ’’ہم اس بات کو یقینی بنا رہے ہیں کہ تمام ملکی اور بین الاقوامی سیاحوں کا جموں کشمیر میں ایک یاد گار قیام ہو۔‘‘
سیاحت کے سیکریٹری کے مطابق رواں برس اب تک تقریباً۶۰ لاکھ سے زائد سیاحوں نے وادی کشمیر کی سیر کی جن میں تقریباً ۳ لاکھ امرناتھ یاتری بھی شامل ہیں۔ وہیں سال۲۰۲۲ میں۸۸ء۱کروڑ سیاح جموں کشمیر آئے لیکن انتظامیہ توقع کر رہی ہے کہ امسال یہاں آنے والے سیاحوں کی تعداد ۲کروڑ سے تجاوز کر جائے گی۔
شاہ نے مزید کہا کہ ملکی اور غیر ملکی سیاحوں کے بڑھتے ہوئے رش کے ساتھ جموں وکشمیر میں سیاحت نئی بلندیوں کو چھو رہی ہے۔ جس سے مرکزی زیر انتظام علاقہ ملک کے سر فہرست مقامات میں سے ایک بن گیا ہے۔