ورلڈ کپ:پاکستانی قومی ٹیم کی روانگی سے قبل سکیورٹی وفد ہندوستان بھیجنے کی تجویز پر غور

اسلام آباد// پاکستان کرکٹ ٹیم کی رواں سال ہندوستان میں ہونے والے ورلڈ کپ میں شرکت کے معاملے پر بنائی گئی حکومتی کمیٹی کا پہلا اجلاس اسلام آباد میں ہوا جس میں اکثریت نے ٹیم کو ورلڈ کپ کیلئے ہندوستان بھیجنے پر اتفاق کیا تاہم ٹیم کی ہندوستان روانگی سے قبل سکیورٹی کی ضمانت حاصل کی جائے گی، انتظامات کا جائزہ لینے کیلئے ٹیم کی روانگی سے قبل ایک وفد بھارت بھیجنے کی تجویز پر بھی غور کیا گیا۔
پاکستان کرکٹ ٹیم کو اس سال اکتوبر نومبر میں ہندوستان میں کرکٹ ورلڈ کپ میں شرکت کرنی ہے، پاکستان کرکٹ بورڈ ( پی سی بی) نے قومی ٹیم کی انڈیا روانگی کے حوالے سے وزیر اعظم شہباز شریف سے رائے لی تھی جس پر وزیر اعظم نے وزیر خارجہ بلاول بھٹو کی سربراہی میں کمیٹی تشکیل دی تھی۔
کمیٹی کا پہلا اجلاس جمعرات کو دفتر خارجہ میں ہوا جس میں مختلف وفاقی وزراء اور وزرائے مملکت کے ساتھ سینیئر سیاستدانوں، دفتر خارجہ کے افسران اور سکیورٹی اداروں کے نمائندوں نے بھی شرکت کی۔
پاکستان کرکٹ بورڈ کی منیجمنٹ کمیٹی کے سربراہ ذکاء اشرف نے بھی خصوصی طور پر اجلاس میں شرکت کی اور معاملات پر شرکاء کو بریفنگ دی ۔
ذرائع کے مطابق اجلاس میں اکثریت اس بات پر متفق تھی کہ ٹیم کو ورلڈ کپ کیلئے انڈیا جانا چاہیے تاہم یہ رائے بھی سامنے آئی کہ جب ہندوستان پاکستان نہیں آرہا تو پاکستان کو بھی نہیں جانا چاہیے۔
ذرائع کا کہنا ہے کہ اس بات پر اتفاق ہوا ہے کہ ٹیم کی روانگی سے قبل ہندوستانی حکومت سے سکیورٹی کی گارنٹی لی جائے۔
اجلاس میں پاکستان ٹیم کیلئے سکیورٹی انتظامات کا جائزہ لینے کیلئے ایک سکیورٹی وفد بھی ہندوستان بھیجنے پر غور ہوا جس کیلئے انٹرنیشنل کرکٹ کونسل (آئی سی سی) اور انڈین حکام سے بات کی جائے گی اور اگر معاملات طے پاگئے تو اگست کے تیسرے ہفتے میں ایک جائزہ وفد ہندوستان کا دورہ کرسکتا ہے۔