’عاشورہ ٔمحرم کاجلوس عوام کے تعاون سے ہی سب کچھ ممکن ہو پایا ہے‘

سرینگر//
ایڈیشنل ڈائریکٹر جنرل آف پولیس (اے ڈی جی پی) کشمیر‘ وجے کمار نے سنیچر کے روز کہاکہ بوٹہ کدل سے امام باڈہ زڈی بل تک عاشورہ جلوس کیلئے سیکورٹی کے فل پروف انتظامات کئے گئے ہیں۔
سرینگر میں نامہ نگاروں سے بات چیت کے دورا ن اے ڈی جی پی نے بتایاکہ سرینگر میں عاشورہ جلوس کے پر امن انعقاد کیلئے فل پروف سیکورٹی انتظامات کئے گئے ہیں۔
کمار نے کہاکہ شیعہ آبادی والے علاقوں میں درمیانی شب ہی سیکورٹی فورسز کی تعیناتی عمل میں لائی گئی ۔ان کے مطابق ایک طویل عرصے کے بعد تاریخی جلوس کی اجازت دینا بدلتے ہوئے کشمیر کی عکاسی کرتا ہے ۔
اے ڈی جی پی نے کہا کہ پولیس اس طرح کی تقریبات کیلئے سیکورٹی فراہم کرتی ہے لیکن’’آخری کریڈٹ عوام کو جاتا ہے ۔ان کا کہنا تھا کہ عوام کے تعاون سے ہی یہ سب کچھ ممکن ہو پایا ہے ‘‘۔
کمار نے کہا کہ سیکورٹی کے کڑے انتظامات کئے گئے ہیں اور سب کچھ پر امن طریقے سے ہو رہا ہے ۔انہوں نے کہا کہ رات کے دو بجے سے ہی افسران تعینات تھے ۔
اس موقع پر ضلع ترقیاتی کمشنر سری نگر اعجاز اسد نے کہا کہ یوم عاشورہ کے موقع پر انتظامیہ نے زمینی سطح پر انتظامات کئے ہیں۔
کمار نے بتایا کہ عزادر پر امن طریقے سے آگے بڑھ رہے ہیں اور حضرت امام حسینؑ کی عظیم شہادت کو یاد کر رہے ہیں۔انہوں نے کہاکہ وقت کی اہم ضرورت ہے کہ حضرت امام حسین علیہ السلام کے پیغام کو عام کیا جائے ۔
واضح رہے کہ انتظامیہ نے عاشورہ کے موقع پر بوٹہ کدل سے امام باڑہ زڈی بل تک عظیم الشان عاشورہ کے جلوس کی اجازت دی ہے ۔
اس سے قبل۸محرم کو انتظامیہ نے۳۴سال میں پہلی بار گرو بازار سے ایم اے روڈ سے ڈل گیٹ تک جلوس نکالنے کی اجازت دی تھی۔