پولیس سربراہ اور چنار کور کے جی او سی کا وادی کی سیکورٹی صورتحال کا جائزہ

سرینگر//
جموںکشمیر پولیس کے سربراہ دلباغ سنگھ اور کور کمانڈر لیفٹیننٹ جنرل راجیو گھائی نے پولیس ہیڈ کواٹر سرینگر میں سیکورٹی صورتحال کا جائزہ لیا۔
معلوم ہوا ہے کہ میٹنگ کے دوران سرگرم جنگجوؤں کے خلاف مشترکہ طور پر آپریشن شروع کرنے کا فیصلہ لیا گیا ۔
ذرائع نے بتایا کہ منگل کے روز پولیس ہیڈ کواٹر سرینگر میں پولیس سربراہ دلباغ سنگھ اور کور کمانڈر لیفٹیننٹ جنرل راجیو گھائی کی سربراہی میں ایک اعلیٰ سطحی میٹنگ منعقد ہوئی جس میں اے ڈی جی پی ہیڈکواٹر ایم کے سنہا کے علاوہ دیگر سینئر آفیسران نے شرکت کی۔
میٹنگ کے دوران کشمیر میں سیکورٹی گرڈ کو مزید مضبوط کرنے اور ملی ٹینٹوں کے عزائم کو ناکام بنانے کی خاطر حفاظتی اقدامات کو مضبوط کرنے کا فیصلہ لیا گیا۔
ذرائع نے بتایا کہ میٹنگ کے دوران پاکستان کے ساتھ لگنے والی سرحدوں پر دراندازی ، منشیات اور ہتھیاروں کو اس طرف بھیجنے پر تشویش کا اظہار کیا گیا ۔
میٹنگ کے دوران پولیس سربراہ دلباغ سنگھ نے کہاکہ سیکورٹی ایجنسیوں کے درمیان قریبی تال میل کی وجہ سے ملی ٹینٹوں کے منصوبوں کو ناکام بنانے میں مدد ملی ہے ۔
سنگھ نے فوج اور پولیس کے درمیان مستقل بنیادوں پر انٹیلی جنس شیئرنگ کی اہمیت پر زور دیتے ہوئے کہاکہ مختلف سیکورٹی اداروں کے درمیان قریبی تال میل ناگزیر ہے ۔
ذرائع نے بتایا کہ پولیس اور فوج کے سینئر آفیسران نے سرگرم ملی ٹینٹوں کے خلاف بڑے پیمانے پر مشترکہ آپریشن شروع کرنے کا بھی فیصلہ لیا ہے ۔