آزاد کاسپریم کورٹ میںدفعہ ۳۷۰ پر سماعت کا خیر مقدم

سرینگر//
ڈیموکریٹک پروگریسو آزاد پارٹی (ڈی پی اے پی) کے چیئر مین ‘غلام نبی آزاد نے عدالت عظمیٰ کی طرف سے دفعہ۳۷۰کی منسوخی کو چیلنج کرنے والی درخواستوں کی۱۱ جولائی کو سماعت کیلئے جاری کی جانی والی نوٹس کا خیر مقدم کیا ہے ۔
آزادنے اپنے ایک بیان میں کہا’’عدالت عظمیٰ نے طویل عرصے کے بعد دفعہ۳۷۰کی منسوخی کو چلینج کرنے والی درخواستوں کا نوٹس لیا ہے ‘‘۔
سابق وزیر اعلیٰ کا بیان میں کہنا تھا’’مجھے ایک مثبت نتیجے کی امید ہے کیونکہ میں مکمل حقوق کی بحالی کی خواہش رکھتا ہوں جو۵؍اگست۲۰۱۹کو دفعہ۳۷۰کی منسوخی کے ساتھ منسوخ ہوگئے ‘‘۔
آزاد نے مزید کہا کہ دفعہ۳۷۰‘جموں کشمیر کے تمام خطوں کے بلا لحاظ مذہب و ذات پات مفاد میں ہے ۔انہوں نے کہا’’ہم روز اول سے ہی اس پر زور دے رہے ہیں اور ہمیں یقین ہے کہ عدالت عظمیٰ جموں و کشمیر کے لوگوں کو انصاف اور ان کے مفادات کو تحفظ فراہم کرے گی‘‘۔
قابل ذکر ہے کہ چیف جسٹس آف انڈیا ڈی وائی چندر چوڑ کی سربراہی میں عدالت عظمیٰ کی پانچ رکنی آئینی بینچ دفعہ۳۷۰کی منسوخی کو چیلنج کرنے والی درخواستوں کی سماعت ۱۱جولائی کو شروع کرے گی۔
عدالت عظمیٰ کے سامنے۲۰سے زیادہ عرضیاں زیر التوا ہیں جن میں مرکزی حکومت کے دفعہ۳۷۰کی منسوخی کے فیصلے کو چیلنج کیا گیا ہے ۔