سپریم کو رٹ کادفعہ ۳۷۰ پر جو بھی فیصلہ آئیگا وہ ملک کے مفاد میں ہو گا :رینا

جموں//
جموںکشمیر بھارتیہ جنتاپارٹی(بی جے پی) یونٹ کے صدر ‘رویندر رینا نے منگل کے روز کہاکہ دفعہ۳۷۰ پر ۱۱جولائی سے سپریم کورٹ میں سماعت ہور ہی ہے اور جو بھی فیصلہ آئے گا وہ ملک کے مفاد میں ہوگا۔
رینا نے کہاکہ عدالتوں میں میرٹ کی بنیاد پر فیصلے لئے جاتے ہیں اور ہمیں پورا یقین ہے کہ سماج کے سبھی طبقوں کی رائے کو ملحوظ نظر رکھتے ہوئے یقینا سپریم کورٹ اس معاملے پر حتمی فیصلہ دے گا۔
ان باتوں کا اظہار موصوف نے جموں میں ایک پریس کانفرنس کے دوران کیا۔
دفعہ۳۷۰پر سپریم کورٹ میں شنوائی ہونے کے بارے میں پوچھے گئے سوال کے جواب میں رینا نے کہا کہ جب اس قانون کو نافذ کیا گیا تو اس وقت پارلیمنٹ میں بحث ہوئی اور جب اس کو منسوخ کیا گیا تو پارلیمنٹ کے دونوں ایوانوں میں بحث اور ووٹنگ ہوئی جس کے بعد اس قانون کو ہمیشہ ہمیشہ کے لئے ختم کیا گیا۔
بی جے پی یونٹ صدر نے کہاکہ کچھ افراد نے اس قانون کو منسوخ کرنے کے خلاف سپریم کورٹ میں عرضی دائر کی اور اب عدالت عظمیٰ نے گیارہ جولائی سے اس پر سماعت کرنے کا فیصلہ لیا ہے اور اس حوالے سے ججوں کی ایک ٹیم بھی تشکیل دی گئی ہے ۔
رینا نے کہاکہ چونکہ معاملہ عدالت میں زیر سماعت ہے لہذا اس پر لب کشائی کرنا غیر قانونی ہے ۔انہوں نے کہاکہ ہمیں عدالتوں پو پورا بھروسہ ہے کیونکہ ملک کا جوڈیشل نظام کافی مضبوط ہے ۔انہوں نے مزید بتایا کہ سپریم کورٹ آف انڈیا کی جانب سے اس معاملے پر بہتر طریقے سے شنوائی ہوگی اور بحث و مباحثہ کے بعد ہی فیصلہ سنایا جائے گا۔
بی جے پی یونٹ صدر کے مطابق جو بھی فیصلے آئے گا وہ ملک کے مفاد میں ہوگا کیونکہ عدالتوں میں میرٹ کی بنیاد پر فیصلے لئے جاتے ہیں اور ہمیں پورا یقین ہے کہ عدالت عظمیٰ سماج کے سبھی طبقوں اور انصاف کا خیال رکھتے ہوئے یقینا اس معاملے پر فیصلہ سنائے گی۔انہوں نے مزید بتایا کہ سپریم کورٹ کی جانب سے جو بھی فیصلہ آئے گا اس پر سبھی مطمئن ہونگے ۔
رینا نے کہاکہ جموں وکشمیر کی انتظامیہ نے غریبوں کو پانچ مرلہ اراضی اور مکان تعمیر کرنے کا جو فیصلہ لیا وہ تاریخی ہے ۔
ان کے مطابق اس بڑے فیصلے کیلئے وزیر اعظم مودی ، وزیر داخلہ امیت شاہ اور جموں وکشمیر کے ایل جی منوج سنہا کا دل کی گہرائیوں سے شکریہ ادا کرتے ہیں۔
بی جے پی یونٹ صدر نے مزید بتایا کہ سابقہ حکومتوں نے جموںکشمیر کے لوگوں کو گمراہ کرکے انہیں در در کی ٹھوکریں کھانے پر مجبور کیا ۔
رینا نے کہاکہ سابقہ حکمرانوں نے یہاں کے لوگوں پر ظلم کیا اور روشنی کے نام پر مفاد خصوصی رکھنے والے سیاستدانوں نے سرکاری زمینوں پر قبضہ کرکے غریبوں کیلئے دروازے بند کردئے تھے تاہم موجودہ سرکار نے غریبوں کو مفت زمین دینے کا اعلان کیا ہے جو خوش آئند اقدام ہے اورا س کی جتنی بھی تعریف کی جائے کم ہے ۔
پی ڈی پی کی صدر محبوبہ مفتی کی جانب سے لگائے گئے الزام کہ ای ڈی کا غلط استعمال ہو رہا ہے کے جواب میں رویندر رینا نے کہاکہ ان لوگوں کی سیاسی زمین کھسک چکی ہے اور ملک کے لوگوں نے انہیں مسترد کیا جس وجہ وہ پروپگنڈ ا کر رہے ہیں ، کھبی پٹنہ میں جاکر وہاں پر پروپگنڈا کرتے ہیں تو کھبی بنگلور کے اندر سازشیں رچاتے ہیں۔
رینانے بتایا ملک کے لوگ جانتے ہیں کہ مودی جی نے سب کا ساتھ ، سب کا وشواس اور سب کا وکاس مشن کے تحت ہی کام کیا ہے ۔