اے ڈی جی پی کشمیرکا پنجترنی اور پوتر گھپا کا دورہ

سرینگر///
ایڈیشنل ڈائریکٹر جنرل آف پولیس ( اے ڈی جی پی) کشمیر وجے کمار بدھ کی صبح شری امرناتھ یاترا کیلئے کئے گئے سیکورٹی انتظامات کا جائزہ لینے کیلئے پنجترنی اور پوتر گھپا پہنچے ۔
اس دوران سی آر پی ایف کے انسپکٹر جنرل،آئی بی ایس ایف کے انسپکٹر جنرل‘۳سیکٹر کمانڈر، ایس ایس پی اننت ناگ اور آئی ٹی بی ٹی کے سی او ان کے ہمراہ تھے ۔
یہ جانکاری کشمیر زون پولیس نے اپنے ٹویٹر ہینڈل پر ایک ٹویٹ کے ذریعے فراہم کی۔
ٹویٹ میں کہا گیا’’اے ڈی جی پی کشمیر وجے کمار نے سی آر پی ایف کے انسپکٹر جنرل،آئی بی ایس ایف کے انسپکٹر جنرل‘۳سیکٹر کمانڈر، ایس ایس پی اننت ناگ اور آئی ٹی بی ٹی کے سی او کے ساتھ پنجترنی اور پوتر گھپا کا دورہ کیا‘‘۔
پولیس ٹویٹ میں کہا گیا کہ اس دوران سیکورٹی انتظامات کا جائزہ لیا گیا اور دوسرے متعلقین کے ساتھ بات چیت کی گئی۔
ٹویٹ میں مزید کہا گیا کہ تمام افسران نے پنجترنی سے پو تر گھپا تک کے ٹریک کا مشترکہ معائنہ کیا۔
جنوبی کشمیر کے ہمالیہ پہاڑوں میں۳ہزار۸سو۸۰میٹر کی بلندیوں پر واقع شری امر ناتھ مندر کی سالانہ یاترا یکم جولائی سے شروع ہوگی جو۳۱؍اگست کو اختتام پذیر ہوگی۔
جموں وکشمیر انتظامیہ یاترا کیلئے تمام تر انتظامات کو حتمی شکل دے رہی ہے جہاں سیکورٹی کے فقید المثال بندو بست کیا جا رہا ہے وہیں یاتریوں کو دیگر سہولیات فراہم کرنے کیلئے بھی کوئی کشر باقی نہیں چھوٹی جا رہی ہے ۔
یاتریوں کا پہلا جھتہ۳۰جون کو بھگوتی نگر بیس کمیپ سے گھپا کی طرف روانہ ہوگا۔