سرینگر/28جون
انجمن اوقاف جامع مسجد سری نگر نے مسلمانان کشمیر کو مطلع کیا ہے کہ تاریخی عیدگاہ سری نگر میں نماز عید ادا کرنے کے حوالے سے 9بجے صبح کا جو پروگرام دیا تھا ضلع انتظامیہ نے آج صبح انجمن کے ذمہ داروں کو مطلع کیا کہ حکومت نے فیصلہ کیا ہے کہ عیدگاہ سری نگر میں نماز عید الاضحیٰ کی ادائیگی کی اجازت نہیں دی جائیگی۔
انجمن نے ایک بیان میں اس امر پر سخت افسوس کا اظہار کرتے ہوئے اس فیصلے کی شدید مذمت کی ہے ۔
انجمن نے کہا کہ یہ حد درجہ افسوس کی بات ہے کہ گزشتہ کئی برسوں سے دیدہ و دانستہ عیدین کے بڑے دینی اجتماعات منعقد ہونے نہیں دئے جارہے ہیں جو کہ سراسراسلامی تعلیمات اور شرعی احکامات میں مداخلت کے مترادف ہے ۔
دریں اثنا انجمن نے اس امر پر بھی شدید ردعمل کا اظہار کیا ہے کہ میرواعظ ڈاکٹر مولوی محمد عمر فاروق صاحب کی مختلف دینی، ملی، سیاسی، سماجی تنظیموں اور سول سوسائٹی کی جانب سے رہائی کے حوالے سے مسلسل اپیلوں کی طرف کوئی توجہ نہیں دی جارہی ہے جو حد درجہ افسوسناک اور قابل مذمت ہے ۔
