کشیدہ حالات کے باوجود سوڈان سے عازمین حج سعودی عرب پہنچ گئے

خرطوم//
سوڈان میں کشیدہ حالات کے باوجود سمندر کے راستے 245 افراد پر مشتمل عازمینِ حج کا پہلا گروپ بحری جہاز سے جدہ اسلامی بندر گاہ پہنچ گیا۔
عرب میڈیا کے مطابق سوڈانی عازمین کا بدھ کو جدہ میں وزارتِ حج و عمرہ کے ڈائریکٹر جنرل عبدالرحمٰن الغنام، جدہ اسلامک پورٹ پر محکمہ حج و عمرہ کے ڈائریکٹر نائب صدر مازن بن سعید الغامدی اور دیگر نے استقبال کیا۔
حکام نے عازمین حج کو مبارک باد پیش کی اور انہیں گلدستے، عجوہ کھجور اور آبِ زم زم پیش کیا۔
واضح رہے کہ تقریباً 8 ہفتوں سے زائد سے خرطوم اور سوڈان کے دیگر حصے فوج اور نیم فوجی ریپڈ سپورٹ فورسز کے درمیان خونریز لڑائی کی لپیٹ میں ہیں۔