امریکی صدر جوبائیڈن کو دانتوں کے درد نے پریشان کردیا

واشنگٹن//
امریکا کے صدر جوبائیڈن کو دانتوں کے درد نے پریشان کردیا اور انہیں کچھ ہی دنوں میں دوسری مرتبہ علاج کرانا پڑا۔
غیرملکی میڈیا کے مطابق اس حوالے سے وائٹ ہاؤس کا کہنا ہے کہ امریکی صدر نے پیر کو نیٹو کے سربراہ کے ساتھ ملاقات اور دیگر عوامی تقریبات میں شرکت منسوخ کردی تا کہ ان کا دوسری مرتبہ علاج (روٹ کینال) ہو سکے۔
رپورٹس کے مطابق جوبائیڈن کے ڈاکٹر نے صحافیوں کو بتایا کہ امریکی صدر کو اتوار کو دانت میں درد محسوس ہواجس کے بعد طبی ٹیم نے ان کا معائنہ کیا اور ان کے جبڑوں کا علاج کیا گیا۔
غیرملکی میڈیا کے مطابق پیر کی صبح امریکی صدر کو پھر دانتوں میں درد ہوا جس کے بعد طبی ٹیم نے فیصلہ کیا کہ صدر کا علاج پیر کو وائٹ ہاؤس میں جاری رکھا جائے گا۔
وائٹ ہاؤس کی پریس سیکریٹری نے کہا ہے کہ صدر جو بائیڈن بالکل صحیح ہیں۔
غیرملکی میڈیا کے مطابق امریکی صدر کی اہلیہ جِل بائیڈن نے نیویارک میں پیر کو ایک تقریب میں بھی اس حوالے سے بات کی۔
خاتون اوّل کا کہنا تھا کہ وہ ساری رات تکلیف میں رہے، جس کا مطلب ہے میں بھی ساری رات تکلیف میں رہی۔
انہوں نے حیرانی کا اظہار بھی کیا کہ ڈاکٹرز کی جانب سے جوبائیڈن کو وائٹ ہاؤس کے باہر لے جائے بغیر ہی ان کا علاج کیا گیا۔
اسی تقریب میں امریکی صدر نے شرکاء سے کہا کہ کیا آپ جانتے ہیں کہ وائٹ ہاؤس کے نیچے دانتوں کے ڈاکٹر کا دفتر ہے؟ جومیں نے پہلے کبھی نہیں دیکھا تھا۔