سرینگر//
کشمیر کے دورے پر آئے رہبر ایران آیت اللہ خامنائی کے نمائندہ خاص ‘آغا ڈاکٹر سید مہدی علی زادہ موسوی نے آج نماز ظہر تاریخی جامع مسجد سری نگر میں ادا کی۔
ان کی آمد پر انجمن اوقاف کے ذمہ داروں اور عملہ نے موصوف کا پرتپاک خیر مقدم کیا۔
اس موقعہ پر ڈاکٹر سید مہدی نے جامع مسجد کی منفرد طرز تعمیر اور اس عظیم عبادتگاہ کے حسن و جمال کو دیکھ کر انتہائی خوشی اور مسرت کا اظہار کیا ۔
اس موقعہ پر موصوف کو انجمن اوقاف کی تاریخ اور دیگر علمی تحائف کے ساتھ ساتھ نظر بند میرواعظ کی طرف سے کشمیری شال پیش کیا گیا۔
اس سے قبل موصوف نے تعلیمی انجمن نصرۃ الاسلام کے تحت چلنے والے اسلامیہ اورینٹل کالج، انجمن کی لائبریری، اسلامیہ ہائی اسکول کی تاریخی عمارت اور آڈیٹوریم کا بھی دورہ کیا اور اس اولین دانشگاہ کی تاریخ سے واقفیت حاصل کی۔
اس مرحلے پر موصوف نے انجمن کے عہدیداروں سے گفتگو کرتے ہوئے اسلامیہ اورینٹل کالج میں فارسی زبان کی تعلیم اوراس کے فروغ کیلئے ہر ممکن تعاون کا یقین دلایا تاکہ فارسی جیسی اہم زبان کی تعلیم اور اسے سمجھنے اور سمجھانے کا فہم عام کیا جاسکے ۔