’امرناتھ یاترا ٹریک پر مرمتی کام ۱۵جون سے پہلے مکمل کیا جائے گا‘

سرینگر//
بارڈر روڈ آرگنائزیشن (بی آر او) کا کہنا ہے کہ امرناتھ یاترا ٹریک پر مرمتی کام۱۵جون سے پہلے ہی مکمل کیا جائے گا۔
جنوبی کشمیر کے ہمالیہ پہاڑوں میں۳ہزار۸سو۸۰میٹر کی بلندیوں پر واقع امر ناتھ مندر کی سالانہ یاترا یکم جولائی سے شروع ہوگی جو ۳۱؍اگست کو اختتام پذیر ہوگی۔
سرینگر میں مقیم ایک دفاعی ترجمان نے بتایا کہ بی آر او کے دائرہ ٔکار میں برف ہٹانا‘ ٹریک کی کشادگی،فٹ برجوں کی بحالی،ٹوٹی ہوئی دیواروں کی تعمیر نو وغیرہ شامل ہے ۔انہوں نے کہا کہ بالتل سے گھپا تک کے ٹریک کی دیکھ بھال اس سے قبل محکمہ تعمیرات عامہ جموں و کشمیر نے کی تھی اور چندن واری سے پوتر گھپا تک کی دیکھ بھال پہلگام ڈیولپمنٹ اتھارٹی نے کی تھی۔
ترجمان کا کہنا تھا کہ یہ دونوں ٹریک پچھلے سال ماہ ستمبر میں دیکھ بھال اور اپ گریڈیشن کے لیے بی آر او کے حوالے کیے گئے تھے ۔
بیان میں کہا گیا کہ بی آر او شری امر ناتھ یاترا ٹریک کی مرمت کا کام ۱۵جون سے پہلے مکمل کرے گا۔
اس دوران ڈی جی بی آراو‘ لیفٹیننٹ جنرل راجیو چودری نے بالتل اور چندن واڑی کا دورہ کرکے دونوں یاترا راستوں کا معائنہ کیا۔انہوں نے اس موقع پر بتایا کہ آج یہاں ببار امرناتھ جی کی پہلی پوجا کی گئی۔ان کا کہنا تھا کہ بارڈر روڈ آرگنائزیشن (بی آر او) نے وادی کے اندر کافی اچھا کام کیا ہے ۔
لیفٹیننٹ جنرل نے کہا کہ سال گذشتہ یونین ٹریٹری حکومت نے دونوں یاترا راستوں کے رکھ رکھائو اور دیکھ بھال کی ذمہ داری بی آر او کو سونپی ہے کیونکہ یاتریوں کی تعداد میں ہر سال اضافہ درج ہو رہا ہے ۔انہوں نے کہا کہ سال گذشتہ ۳لاکھ۶۵ہزار یاتریوں نے شری امرناتھ مندر کی یاترا کی جن میں سے۴۵فیصد یاتریوں نے بالتل کے راستے سے جبکہ۵۵فیصد پہلگام کے راستے سے یاترا کی۔ان کا کہنا تھا کہ اس سال ۵لاکھ یاتریوں کے آنے کی توقع ہے ۔
ڈی جی نے کہا کہ جموں وکشمیر انتظامیہ نے یاترا کیلئے بھر پور انتظامات کئے ہیںانہوں نے کہا کہ مرکزی حکومت اور یو ٹی انتظامیہ نے بھی ہمیں راستوں کی دیکھ ریکھ کرنے کی ہدایت دی ہے۔